"ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން ދޫކުރުމަށް ހަމަޖެހިފައިވާ ފްލެޓާއި ގޯތި އޭގެ ހައްގުވެރިންނާއި ހަވާލު ކުރާނެ ކަމަށާއި، އެކަމުގެ ތެރެއަށް ރައީސް ޑރ. މުހައްމަދު މުއިއްޒު އަތް ނުބާނާނެ ކަމަށް އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާހު ވިދާޅުވެއްޖެއެވެ.
ފަލާހް މިހެން ވިދާޅުވީ ފްލެޓްތައް މަޖިލީސް މެންބަރުންނަށް ބަހާ ކަމަށް ބުނެ ފަތުރަމުންދާ ވާހަކަތަކާއި ގުޅިގެން އެކްސްގައި ކުރެއްވި ޕޯސްޓެއްގައެވެ.
"ޕީއެންސީގެ އެއްވެސް މަޖިލީސް މެންބަރުވެސް ގޯހެއް ނުހައްދަވާނެ،" ފަލާހް ވިދާޅުވެފައި ވެއެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގައި 4،000 ފްލެޓް ތަރައްގީ ކުރަމުން އަންނައިރު ފްލެޓަށް އެދި 22،000 އެއްހައި މީހުން ފްލެޓަށް އެދި ކުރިމަތިލިއެވެ. އަދި ގޯއްޗަށް އެދި 18،955 މީހުން ކުރިމަތިލިއެވެ. ދޫކުރަން ނިންމާފައި ވަނީ 9،005 ގޯއްޗެވެ.
ފްލެޓު ލިބޭ މީހުންގެ ލިސްޓެއް ކުރީގެ ސަރުކާރުން، މިދިޔަ ރިޔާސީ އިންތިހާބު ނިމުނުފަހުން ނެރުނެވެ. އެކަމަކު އާންމުންގެ ޝަކުވާބޮޑުވެ، އެންޓި ކޮރަޕްޝަން ކޮމިޝަން (އޭސީސީ) އިން އެ މައްސަލަ ތަހުގީގު ކުރަން ފަށައި، ފްލެޓު ދިނުން މަޑު ޖައްސާލަން އެންގީއެވެ.
މި ހިނގާ އޮކްޓޫބަރު މަސް ނިމުމުގެ ކުރިން ފްލެޓް ލިބޭ މީހުންގެ ލިސްޓް އިއުލާނު ކުރާނެ ކަމަށް ގެދޮރުވެރިކަމާ ބެހޭ ވަޒީރު ޑރ.އަލީ ހައިދަރު ވަނީ ވިދާޅުވެފައެވެ.
