ބައިނަލްއަޤްވާމީ ގޮތުން ފާހަގަ ކުރާ ކާރިސީ ހިރާސްތައް ކުޑަކުރުމުގެ ދުވަހާ ގުޅުވައިގެން ފެނަކަ ކޯޕަރޭޝަންއިން ޚާއްޞަ ޙަރަކާތްތަކެއް ކުރިއަށް ގެންގޮސްފިއެވެ.
ފެނަކައިން ބުނެފައިވާ ގޮތުގައި، ފެނަކައިގެ ޚިދުމަތްދޭ ރާއްޖޭގެ 151 ރަށެއްގައި ޤާއިމްކޮށްފައިވާ ފެނަކައިގެ ބްރާންޗްތަކުގެ މުވައްޒަފުންނަށް ޚާއްސަކޮށް، ކުއްލި ޙާލަތްތަކުގައި އިޖާބަދޭނެ ގޮތުގެ ޢުޞޫލުތަކެއް އެކުލަވާލެވި ތަންފީޒު ކުރަން ފެށުނެވެ.
ފެނަކައިން ބުނީ، މި ޢުޞޫލުގައި، ޤުދުރަތީ ގޮތުން ނުވަތަ އެހެނިހެން ސަބަބުތައް މެދުވެރިވެގެން ކުރިމަތިވާ ކުއްލި ޙާލަތްތަކުގައި ޢަމަލުކުރަންޖެހޭ ގޮތްތަކުގެ ތަފްސީލުގެ އިތުރުން، މިފަދަ ޙާލަތްތަކުގައި ޙަރަކާތްތެރިވާނެ ޓީމް އެކުލަވާލެވިގެންވާ ގޮތް ހިމެނޭކަމަށެވެ.
"ތައްޔާރު" ގެ ނަމުގައި މި ފެށުނު ޙަރަކާތް، އެ ކުންފުނިން ޚިދުމަތްދޭ ހުރިހާ ބްރާންޗްތަކެއްގައި މިއަދު ހެނދުނު ކުރިއަށް ގެންދެވުނުއިރު، އެ ޓީމްތަކަށް މުވައްޒަފުން ކަނޑައެޅި، އެފަދަ ޙާލަތެއްގައި ޓީމުތަކާއި މުވައްޒަފުން ޙަރަކާތްތެރިވާންޖެހޭ ގޮތުގެ ތިއަރީ ތަމްރީނުތަކެއް ކުރިއަށް ގެންގޮސްފައިވާކަމަށް ފެނަކައިން ބުނެފައިވެއެވެ. މިއީ، ކާރިސާތަކާއި ކުއްލި ޙާލަތްތަކުގައި ޢަމަލު ކުރާނެގޮތުގެ އިތުރުން، ފެނަކައިގެ ޢިމާރާތްތަކުގައި ހުންނަން ޖެހޭ ސަލާމަތީ މިންގަނޑު، ޔުޓިލިޓީ ރެގިއުލޭޓަރީ ޤަވައިދާ އެއްގޮތަށް އެކުލަވާލުމުގެ މަސައްކަތުގެވެސް މުހިއްމު ފިޔަވަޅެއްކަމަށް އެ ކުންފުނިން ފާހަގަކުރިއެވެ.
ފެނަކައިން އިތުރަށް ބުނީ، މި ޙަރަކާތަކީ، ކުރިއަށް އޮތް އަހަރެއްހާ ދުވަހަށް ރާވާލެވިފައިވާ ގިނަ ބައިތަކެއްގެ މައްޗަށް އެކުލެވޭ ޙަރަކާތެއް ކަމަށެވެ. އެގޮތުން އެންމެ ބޮޑު އިސްކަމެއްގެ ގޮތުގައި، ކުއްލި ޙާލަތްތަކުގައި އަމަލުކުރާނެ ގޮތުގެ އަމަލީ ތަމްރީނުތައް މުވައްޒަފުންނަށް ދިނުމާއި، މި ފަދަ ޙާލަތްތަކަށް ބޭނުންވާނެ އަސާސީ ސާމާނު، ފެނަކައިގެ ހުރިހާ ބްރާންޗެއްގައި ހުރިކަން ކަށަވަރުކުރުން ހިމެނެއެވެ.
މީގެ އިތުރުން، ކުއްލި ޙާލަތްތަކަށް ތައްޔާރުވުމަށް މުވައްޒަފުންނަށް ބޭނުންވާނެ ޢަމަލީ ތަމްރީނު ދިނުމަށްޓަކައި، އެމްއެންޑީއެފްއާއެކު މިހާރު މަޝްވަރާތައް ފެށިފައިވާކަމަށް ފެނަކައިން ހާމަކުރިއެވެ. އަދި ކުރިއަށް އޮތް އަހަރު ދުވަހަށް ބަލާލައިގެން މިފަދަ ތަމްރީނުތައް ކުރިއަށް ގެންދިޔުމަށް އެމްއެންޑީއެފްއާއެކު އެމްއޯޔޫއެއްގައި ސޮއި ކުރުމުގެ މަސައްކަތްވެސް އެ ކުންފުނިން ކުރަމުންދާކަމަށް ފާހަގަކުރިއެވެ.
ފެނަކައިގެ މަޤުސަދަކީ، ފެނަކައިން ހިންގާ ހުރިހާ އިންޖީނުގެތަކާއި، އާރުއޯ ޕްލާންޓްތައް، ޔުޓިލިޓީ ރެގިއުލޭޓަރީގެ ސަލާމަތީ މިންގަނޑުތަކަށް ފެއްތުމާއެކު، ފެނަކައިގެ ކޮންމެ ބްރާންޗެއްގައިވެސް ކުއްލި ޙާލަތްތަކަށް ތައްޔާރުވެފައި ތިބި މުވައްޒަފުން ތިބިކަން ޔަގީންކުރުންކަމަށް ފެނަކައިން ބުނެފައިވެއެވެ.
