މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގައި ބައިވެރިވުމުވުމުގެ ފުރުސަތު މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އާއި މޯލްޑިވްސް މެރިން ރިސާރޗް އިންސްޓިޓިއުޓުން ހުޅުވާލައިފިއެވެ.
މި ޕްރޮގްރާމްގެ މަޤްޞަދަކީ ފަރުމަސް އާލާކުރުމުގެ ހުނަރު އުނގަންނައިދީ މިދާއިރާއިން މީހުން ބިނާކުރުމެވެ.
މިއީ މި ޕްރޮގްރާމްގެ ދަށުން ހިންގޭ ދެވަނަ ތަމްރީނެވެ. މި ތަމްރީން ޕްރޮގްރާމް ކުރިއަށްދާނީ 30 އޮކްޓޯބަރު 2024 އިން 12 ނޮވެންބަރު 2024 އަށްކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން މައުލޫމާތުދެއެވެ. އަދި 14 ދުވަހުގެ މުއްދަތަށް ހިންގޭ މި ތަމްރީނުގައި ބައިވެރިވުމުގެ ފުރުސަތު 15 ފަރާތަކަށް ދެވޭނެކަމަށް އެ މިނިސްޓްރީން ވިދާޅުވިއެވެ.
މި ތަމްރީނުގައި މާގަނޑުމަސް ވިއްސައި އާލާކޮށް ބޮޑެތިކުރުމާއި، ހުއިފިލަނޑާ އަދި ފާނާ އާލާކޮށް މޫދުކޮށީގައި ބޮޑެތިކުރުމާއި، އިތާމުތް އާލާކުރުން ފަދަ ދިރޭކާނާ އާލާކުރުމުގެ ހުނަރުތައް ދަސްކޮށްދެވޭނެއެވެ.
ޕްރޮގްރާމްގައި ބައިވެރިވާން ޝައުޤުވެރިވާ ފަރާތްތަކުން 15 އޮކްޓޯބަރު 2024 ވަނަ ދުވަހުގެ 14:00 ގެ ކުރިން އިޢުލާނާއެކު އެއްކަރުދާސްކޮށްފައިވާ ފޯމު ފުރިހަމަކުރުމަށްފަހު، އައިޑީކާޑުގެ ކޮޕީއާއެކު ހުށަހެޅުމަށް މިނިސްޓްރީން ވަނީ އެދިލައްވާފައިއެވެ. އީމެއިލް މެދުވެރިކޮށް ފޯމު ހުށަހަޅާނީ [email protected] އަށެވެ.
ކޯހުގެ މުއްދަތުގައި ބައިވެރިން ތިބޭނީ ކ. މަނިޔަފުށީގައެވެ. ބައިވެރިންގެ ދަތުރުފަތުރާއި، ހުރުމާއި ކެއުމުގެ އިންތިޒާމްތައް މޯލްޑިވްސް މެރިން ރިސާރޗް އިންސްޓިޓިއުޓުން ހަމަޖައްސައިދޭނެއެވެ.
ތަމްރީނާ ގުޅޭ އިތުރު މަޢުލޫމާތު ހޯދުމަށް 3322242 ނަންބަރު ފޯނަށް ގުޅުމަށް މިނިސްޓްރީން އެދިލައްވައެވެ.
