މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނާރޖީ ޠާރިޤް އިބްރާހީމް، ޖަޕާނުގެ ސަފީރު ތަކެއުޗި މިދޯރިއާ ބައްދަލު ކުރައްވައިފިއެވެ.
މި ބައްދަލުވުން ބޭއްވުނީ މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނާރޖީގައެވެ. މި ބައްދަލުކުރެއްވުމުގައި ދެ ފަރާތުން މަޝްވަރާކުރެއްވި މައިގަނޑު މަޢުޟޫޢަކީ ޖަޕާނު ސަރުކާރުގެ އެހީގައި ދިވެހިރާއްޖޭގައި ޤާއިމުކުރުމަށް ހަމަޖެހިފައިވާ ސޯލާ ޕީވީ އަދި އެން.އޭ.އެސް ބެޓަރީ ސްޓޯރޭޖް ވޯޓަރ ޑީސެލިނޭޝަން ޕްލާންޓުގެ ތަންފީޒީ މަސައްކަތްތަކެވެ. މި މަޝްރޫޢުގެ މައިގަނޑު މަޤްޞަދަކީ ރާއްޖޭގެ ފެނުގެ ރައްކާތެރިކަން އިތުރުކުރުމެވެ.
މިނިސްޓަރ ޠާރިޤް އިބްރާހީމް މި ބައްދަލުވުމުގައި ވިދާޅުވީ، މިފަދަ މުހިންމު މަޝްރޫޢެއް ކުރިއަށް ގެންދިއުމަށް ޖަޕާނު ސަރުކާރުން ދެއްވާ އެހީތެރިކަމަށްޓަކައި ޝުކުރު އަދާކުރައްވާ ކަމަށެވެ. އަދި މި މަޝްރޫޢުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށް ވެސް އެމަނިކުފާނު ވިދާޅުވިއެވެ.
މި ބައްދަލުވުމުގައި ދެ ފަރާތުން ވެސް އެއްބަސްވެވަޑައިގަތީ މި މަޝްރޫޢުގެ ތަންފީޒީ މަސައްކަތްތައް އަވަހަށް ފެށުމަށް މަސައްކަތްކުރުމަށެވެ. މި މަޝްރޫޢުގެ ސަބަބުން ރާއްޖޭގެ ފެނުގެ ރައްކާތެރިކަން އިތުރުވެ، ތިމާވެއްޓާ ރައްޓެހި ހަކަތަ އުފެއްދުމަށް އިތުރު ފުރުޞަތުތަކެއް ހުޅުވިގެންދާނެ ކަމަށް އުންމީދުކުރެވެއެވެ.
