ދިވެހިރާއްޖޭގެ ތަރައްގީއަށް ބޭނުންވާ މަތީ ތަޢުލީމުގެ ދާއިރާތަކާ ގުޅޭ ދިރާސާ ރިޕޯޓެއް އެކުލަވާލުމުގެ މަސައްކަތް ފަށައިފިއެވެ.
މި މަސައްކަތް ކުރިއަށް ގެންދަނީ މަތީ ތަޢުލީމާއި މަސައްކަތްތެރިކަމާއި، ހުނަރުތައް ތަރައްޤީކުރުމާއި ބެހޭ ވުޒާރާގެ ދަށުން ހިންގާ ސަސްޓެއިނަބަލް އެންޑް އިންޓެގްރޭޓެޑް ލޭބަރ ސަރވިސެސް (ސެއިލްސް) ޕްރޮޖެކްޓް މެދުވެރިކޮށެވެ. މި ޕްރޮޖެކްޓަކީ ވޯލްޑް ބޭންކްގެ އެހީގައި ކުރިއަށް ގެންދާ ޕްރޮޖެކްޓެކެވެ. "ނެޝަނަލް ހިއުމަން ކެޕިޓަލް ނީޑް އެނާލިސިސް" ގެ ނަމުގައި ކުރިއަށް ގެންދާ މި ދިރާސާގެ މައިގަނޑު މަޤްޞަދަކީ ދިވެހިރާއްޖޭގެ ތަރައްޤީއާއި ކުރިއެރުމަށް އެންމެ ބޭނުންވާ ދާއިރާތަކުން މަތީ ތަޢުލީމާއި ތަމްރީނުގެ ފުރުޞަތުތަށް ފަހިކޮށްދިނުމެވެ.
މި ދިރާސާގެ ބޭނުމަށް، ރާއްޖޭގެ ތަރައްޤީއަށް އެންމެ ބޭނުންވާ މަތީ ތަޢުލީމުގެ ދާއިރާތަކާއި ގުޅޭ މަޢުލޫމާތު ހޯދުމަށް ސަރުކާރުގެ އެންމެހާ އިދާރާތަކާއި، ސަރުކާރުގެ ކުންފުނިތަކުގެ އިތުރުން ކައުންސިލްތަކާ ވަނީ މުޢާމަލާތްކޮށްފައެވެ.
މަތީ ތަޢުލީމާއި ބެހޭ ވުޒާރާއިން މަޢުލޫމާތު ދެއްވިގޮތުގައި، މިހާރު ސެއިލްސް ޕްރޮޖެކްޓުން އަންނަނީ މަޢުލޫމާތު ލިބިފައި ނުވާ ފަރާތްތަކުން މަޢުލޫމާތު ހޯދުމުގެ މަސައްކަތާއި، މިހާތަނަށް ލިބިފައިވާ މަޢުލޫމާތު ތަރުތީބުކުރުމުގެ މަސައްކަތްތަށް ކުރަމުންނެވެ. އަދި މި ދިރާސާ ރިޕޯޓްގެ ފުރަތަމަ ޑްރާފްޓް ވަނީ ކަމާބެހޭ ފަރާތްތަކަށް ހުށަހަޅައި، އެ ރިޕޯޓާއި ގުޅޭ ވެލިޑޭޝަން ވޯކްޝޮޕެއް ބާއްވާފައެވެ.
މި ދިރާސާގެ ނަތީޖާ ބޭނުންކޮށްގެން، ރާއްޖޭގެ ތަރައްޤީއަށް މުހިންމު ދާއިރާތަކުން މީހުން ބިނާކުރުމަށް ބޭނުންވާ މަޢުލޫމާތު ލިބި، އެކަމަށް ރޭވުންތެރިކަމާއެކު މަސައްކަތްކުރެވޭނެ ކަމަށް އުންމީދުކުރެވެއެވެ. މިއީ ދިވެހިރާއްޖޭގެ މުސްތަޤުބަލަށް ވަރަށް މުހިންމު ދިރާސާއެކެވެ.
