އިސްލާމީ ކަންތައްތަކާ ބެހޭ ވުޒާރާއިން ހިންގާ ރިސާލަތު ޕްރޮގުރާމްގެ ދަށުން ސްޓެލްކޯގެ މުވައްޒަފުންނަށް ޚާއްޞަ ދަރުސެއް ކުރިއަށް ގެންގޮސްފިއެވެ.
މި ދަރުސް ބޭއްވުނީ ސްޓެލްކޯގެ އޮފީހުގައި ކަމަށް އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތު ދީފައިވެއެވެ. "ނަމާދު" މައުޟޫޢުއަށް އަމާޒުކޮށްގެން ކުރިއަށް ގެންދެވުނު މި ދަރުސް ނަންގަވައިދެއްވީ އިސްލާމީ މަރުކަޒުގެ ވާޢިޡް އައްޝައިޚް ޢަބްދުލް ޤާދިރެވެ. މި ދަރުސްގައި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަޙުމީގެ އިތުރުން ކުންފުނީގެ ގިނަ އަދަދެއްގެ މުވައްޒަފުން ބައިވެރިވެލެއްވިއެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ރިސާލަތު ޕްރޮގުރާމަކީ ދިވެހިންގެ މެދުގައި ދީނީ ހޭލުންތެރިކަން އިތުރުކުރުމަށް ރޭވިގެން ހިންގޭ މުހިންމު ޕްރޮގުރާމެއް ކަމަށެވެ. މި ޕްރޮގުރާމްގެ ދަށުން އެކި މުއައްސަސާތަކުގައި މިފަދަ ދަރުސްތައް ކުރިއަށް ގެންދާކަމަށް އެ ވުޒާރާއިން ހާމަކުރެއްވިއެވެ.
ސްޓެލްކޯގައި ކުރިއަށް ގެންދެވުނު މި ދަރުސްގައި ނަމާދުގެ މުހިންމުކަމާއި، ނަމާދު ކުރުމުގެ ސަބަބުން ލިބޭ ދުނިޔަވީ އަދި އުޚްރަވީީ ފައިދާތަކުގެ މައްޗަށް އަލިއަޅުވާލެވުނު ކަމަށް ބައިވެރިންގެ ފަރާތުން މަޢުލޫމާތު ލިބިފައިވެއެވެ. އަދި މި ދަރުސްގެ ސަބަބުން މުވައްޒަފުންގެ މެދުގައި ދީނީ ހޭލުންތެރިކަން އިތުރުވެގެންދާނެ ކަމަށް ސްޓެލްކޯގެ އިސްވެރިން އުންމީދު ކުރައްވާ ކަމަށްވެސް މަޢުލޫމާތު ލިބެއެވެ.
