މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ސަދަން އޭރިއާ ކޮމާންޑާއި ގއ. ކަނޑުހުޅުދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ގުޅިގެން އެ ރަށުގެ ކަނބަލުންނަށް އަމާޒުކޮށްގެން މޫދު ކަސްރަތު ޕްރޮގްރާމެއް ހިންގައިފިއެވެ.
މި ޕްރޮގްރާމް ނިންމުމުގެ ގޮތުން އޮކްޓޫބަރު 13 ވަނަ ދުވަހު ކަނޑުހުޅުދޫގައި ބޭއްވުނު ރަސްމިއްޔާތު ޝަރަފުވެރިކޮށްދެއްވީ އެ ރަށު ކޯޓުގެ ކުރީގެ އިސް ޤާޒީ، އަލްފާޟިލް ޙަސަން ދީދީއެވެ. މި ރަސްމިއްޔާތުގައި، ޕްރޮގްރާމުގެ މުދައްރިބުންގެ ގޮތުގައި ހަރަކާތްތެރިވި އެމްއެންޑީއެފް ސަދަން އޭރިއާ ކޮމާންޑްގެ ސްވިމިންގ އިންސްޓްރަކްޓަރުންނަށް، ޕްރޮގްރާމުގެ ބައިވެރިން ހަނދާނީ ފިލާ އަރުވާފައިވެއެވެ.
ސެޕްޓެންބަރު 12 އިން ފެށިގެން އޮކްޓޫބަރު 11 ވަނަ ދުވަހުގެ ނިޔަލަށް ކުރިއަށް ގެންދިޔަ މި ޕްރޮގްރާމުގައި ކަނޑުހުޅުދޫގެ 33 ކަނބަލުން ބައިވެރިވެ، ޕްރޮގްރާމް ފުރިހަމަކޮށްފައިވެއެވެ.
މި ޕްރޮގްރާމަކީ ރައްޔިތުންގެ ދުޅަހެޔޮކަމާއި ޞިއްޙަތު ކުރިއެރުވުމުގެ އިގެ އިތުރުން، ރައްޔިތުން ބާރުވެރިކުރުމާއި އިޖުތިމާޢީ ގުޅުން ބަދަހިކުރުމަށް އަމާޒުކޮށްގެން ހިންގުނު ޕްރޮގްރާމެކެވެ. މީގެ އިތުރުން، އެއްބައިވަންތަކަމާއި އެކުވެރިކަން އާލާކޮށް، އެއްބަޔަކު އަނެއް ބަޔަކަށް އިޙްތިރާމްކުރާ މުޖުތަމަޢެއް ބިނާކުރުމަކީވެސް މި ޕްރޮގްރާމުގެ މަޤްޞަދުތަކުގެ ތެރޭގައި ހިމެނޭ ކަމެކެވެ.
