ދުނިޔޭގެ ކާބޯތަކެތީގެ ދުވަހާ ގުޅުވައިގެން ނެއްލައިދޫގައި ކާބޯތަކެތީގެ މައުރަޒެއް ބޭއްވުމަށް ނިންމައިފިއެވެ.
މި މައުރަޒަކީ ނެއްލައިދޫ އަންހެނުން ތަރައްޤީއަށް މަސައްކަތް ކުރާ ކޮމެޓީއާއި ނެއްލައިދޫ ކައުންސިލް ގުޅިގެން އިންތިޒާމުކުރާ ޙަރަކާތެކެވެ. ނެއްލައިދޫ ކައުންސިލުން މަޢުލޫމާތު ދެއްވިގޮތުގައި، މި މައުރަޒު ބޭއްވުމަށް ހަމަޖެހިފައިވަނީ މި މަހުގެ 16 ވާ ބުދަ ދުވަހުގެ ހަވީރު 4:15 އިން 5:30 އަށް ނެއްލައިދޫ ބަނދަރު ސަރަހައްދުގައެވެ. މި މައުރަޒުގައި ޚާއްޞަ އަހައްމިއްޔަތުކަމެއް ދެވޭނީ ނެއްލައިދޫގައި އުފައްދާ އަމިއްލަ އުފެއްދުންތަކާއި ދަނޑުވެރިކަމުގެ ބާވަތްތަކަށެވެ.
ކައުންސިލުން އިތުރަށް ވިދާޅުވީ، މި މައުރަޒުގައި ބައިވެރިވުމަށް ޝައުޤުވެރިވާ ފަރާތްތަކަށް ވަކި ލިންކެއް މެދުވެރިކޮށް ނުވަތަ ކައުންސިލްގެ ނަންބަރު 6520041 އަށް ގުޅައިގެން ނަން ނޯޓުކުރެވޭނެ ކަމަށެވެ.
މި މައުރަޒަކީ ރަށުގެ އުފެއްދުންތެރިކަން އާންމުންނަށް ދެއްކުމުގެ އިތުރުން، ދުނިޔޭގެ ކާބޯތަކެތީގެ ދުވަހުގެ މުހިންމުކަން ފާހަގަކުރުމަށް ބޭއްވޭ ޙަރަކާތެއް ކަން ފާހަގަ ކުރެވެއެވެ. އަދި މިފަަދަ މައުރަޒުތަކުން ރަށުގެ އިޤްތިޞާދަށް ކުރިއެރުން ލިބި، ރައްޔިތުންގެ މެދުގައި އެކުވެރިކަން އިތުރުވެގެންދާނެ ކަމަށް އުންމީދުކުރެވެ.
