ސަރުކާރުގެ މައިގަނޑު އަމާޒަކީ ވިލިމާލެ ހޮސްޕިޓަލް 2 އަހަރު ތެރޭގައި ނިންމައި ޚިދުމަތް ދޭން ފެށުންކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު މިހެން ވިދާޅުވެފައިވަނީ ހޮސްޕިޓަލުގެ ޓެންޑަރިންގ މަރުޙަލާ ފެށުމުގެ ގޮތުން ޗައިނާއާއެކު އެއްބަސްވުންތަކެއްގައި ސޮއިކުރުމަށް ބޭއްވުނު ރަސްމިއްޔާތެއްގައެވެ. މި އެއްބަސްވުމުގައި ސޮއިކުރެއްވީ ވަޒީރު ޑރ. މުއްޠަލިބާއި ދިވެހިރާއްޖެއަށް ކަނޑައަޅުއްވާފައި ހުންނަވާ ޗައިނާގެ ސަފީރު ވަންގ ލީޝިންއެވެ.
މި ރަސްމިއްޔާތުގައި ވަޒީރު ޑރ. މުއްޠަލިބު ވިދާޅުވީ މި މަޝްރޫޢާ ގުޅޭގޮތުން އެކި ހޮސްޕިޓަލުތަކާއި، ވުޒާރާތަކާއި އަދި ކަމާބެހޭ އޭ އިދާރާތަކާ ފުޅާ ދާއިރާއެއްގައި މަޝްވަރާކުރެވިފައިވާ ކަމަށެވެ. ވަޒީރު ފާހަގަކުރެއްވި ގޮތުގައި ޓެންޑަރިންގ މަރުޙަލާ 6 މަސްދުވަހުގެ ތެރޭގައި ނިމޭނެ ކަމަށް ލަފާކުރެވޭ ކަމަށާއި، މި މުއްދަތުގެ ތެރޭގައި ހޮސްޕިޓަލުގެ ޑިޒައިން ނިންމައި، ބިޑިންގ ޕްރޮސެސްއަށްފަހު ޢަމަލީ މަސައްކަތް ޗައިނާގެ ކުންފުންޏަކާ ޙަވާލުކުރެވޭނެ ކަމަށެވެ. އަދި ހޮސްޕިޓަލުގެ ތަރައްޤީގެ މަސައްކަތް 2 އަހަރުގެ މުއްދަތުގެ ތެރޭގައި ނިމޭނެ ކަމަށް އުންމީދުކުރައްވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ވަޒީރު މުއްޠަލިބު ހާމަކުރެއްވި ގޮތުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ސިއްހަތާ ބެހޭ ވުޒާރާއާއި ގުޅިގެން ހޮސްޕިޓަލަށް ބޭނުންވާ އާލާތްތަކާއި، ޚިދުމަތްތަކާއި އަދި އެހެނިހެން މުހިންމު ބޭނުންތަކާ ގުޅޭ މަޢުލޫމާތު ވަނީ އެއްކުރެވިފައިއެވެ.
އަލަށް ތަރައްޤީކުރެވޭ މި ހޮސްޕިޓަލުގައި 100 އެނދުގެ ޖާގަ އޮންނާނެއެވެ. މި ތަރައްޤީގެ މަޝްރޫޢު މުޅިން ފަންޑުކުރަނީ ޗައިނާ ސަރުކާރުން ކަމަށްވާއިރު، މިއީ ރައީސް ޑރ. މުޙައްމަދު މުޢިއްޒު ޗައިނާއަށް ކުރެއްވި ރަސްމީ ދަތުރުފުޅަށްފަހު ލިބުނު ކާމިޔާބީއެކެވެ.
މިހާރު ވިލިމާލޭ ހޮސްޕިޓަލުގައި ހުރީ އިމަޖެންސީ 5 އެނދާއި 3 ފަރުވާދޭ ކޮޓަރި އެކަނި ކަމުން، ބައެއް ރައްޔިތުން އަސާސީ ޞިއްޙީ ޚިދުމަތްތައް ހޯދުމަށް މާލެ ދަތުރުކުރަން ޖެހެއެވެ. ވިލިމާލޭގައި ގާތްގަނޑަކަށް 15،000 މީހުން ދިރިއުޅެއެވެ.
