މިއަހަރު މާރޗް މަހު ފެށުނު ސީ-ޓު-އެއަރ ކާގޯ ޚިދުމަތަތުގައި ފާހަގަކޮށްލެވޭ ކުރިއެރުމެއް ލިބިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ރިޕޯޓުކޮށްފިއެވެ.
މި ޚިދުމަތުން ވަނީ މާރޗް މަހުން ފެށިގެން 715 ޓަނަށްވުރެ ގިނަ މުދާ ބަލަހައްޓައި، 147 ޓީއީޔޫ (ޓްވެންޓީ-ފުޓް އިކުއިވެލެންޓް ޔުނިޓްސް) ޕްރޮސެސްކޮށް، ދުނިޔޭގެ 12 ޤައުމަކާ 8 މައި އެއަރލައިނެއް ގުޅުވާލާފައެވެ.
މީގެ ތެރޭގައި ހިމެނެނީ އެރޮފްލޮޓް، އެމިރޭޓްސް، އެތިހާދު، ޤަތަރު އެއަރވޭޒް، ނިއޯސް، ގަލްފް އެއަރ، ލުފްތަންޒާ އަދި ޓަރކިޝް އެއަރލައިންސްއެވެ. އަދި މަންޒިލްތަކުގެ ތެރޭގައި އިޓަލީ އާއި ޖަރުމަނުވިލާތުން ފެށިގެން އެމެރިކާ، އިނގިރޭސިވިލާތް އަދި ކެނެޑާ ހިމެނެއެވެ. މި ކުރިއެރުމުން ފާހަގަކޮށްދެނީ ދުނިޔޭގެ މުދާ ބަދަލުކުރުމުގެ އިތުބާރުހުރި މަރުކަޒެއްގެ ގޮތުގައި ދިވެހިރާއްޖޭގެ އަހަންމިއްޔަތުކަން އިތުރުވަމުންދާކަމެވެ.
އެމްޕީއެލްއިން މޯލްޑިވްސް ސްޓޭޓް ޝިޕިންގ (އެމްއެސްއެސް) އަދި ބައިނަލްއަޤްވާމީ އެއަރލައިންތަކާ ގުޅިގެން ތަޢާރަފުކުރި ކަނޑުން-ވައިގެ މަގަށް މުދާ އުފުލުމުގެ ޚިދުމަތުގައި، އެހެން ޤައުމުތަކުން މުދާ އިމްޕޯޓްކޮށް އެކި ޤައުމުތަކަށް އަލުން އެކްސްޕޯޓްކުރުން ހިމެނެއެވެ.
ކަނޑުން-ވައިގެ މަގަށް ޓްރާންސްޝިޕްމަންޓް ޚިދުމަތް ތަޢާރަފުކޮށްފައިވަނީ، ކަނޑު މަގުން މުދާ އުފުލުމަށް ހޭދަވާ މުއްދަތު ކުރުކޮށް އަވަސް އެހީތެރިކަން ފޯރުކޮށްދިނުމުގެ މަޤޤްޞަދުގައެވެ. މި ހައިބްރިޑް މޮޑެލްގެ މަޤްޞަދަކީ ވިޔަފާރީގެ ދާއިރާގައި ހުރި ބޭނުންތައް ހަލުވިކަމާއެކު ފުއްދައިދިނުމެވެ. މި ޚިދުމަތުގެ ސަބަބުން ދިވެހިރާއްޖެއަށް ލިބޭނެ މައިގަނޑު ފައިދާއަކީ، އެކްސްޕޯޓް ކުރުމުގެ މަސައްކަތް އަވަސްކުރުމަށް އާންމުކޮށް ބޭރު ޤައުމުތަކުން ފޯރުކޮށްދޭ މި ޚިދުމަތުގެ ސަބަބުން އެކި ޤައުމުތަކަށް، ޚާއްޞަކޮށް ޔޫރަޕުގެ މަންޒިލްތަކަށް ދަތުރުކުރާ ފްލައިޓްތަކުގެ އަދަދު އިތުރުވުމެވެ.
