71 ވަނަ އަސާސީ ތަމްރީނު ކޯސް އިފުތިތާހު ކުރުމުގެ ރަސްމިއްޔާތު ބާއްވައިފިއެވެ.
މިކަމަށްޓަކައި މިއަދު އެމްއެންޑީއެފް ނޮދަން އޭރިއާ ކޮމާންޑް، ޅ. މާފިލާފުށީގައި ހުންނަ އެމްއެންޑީއެފް ދަ ބޭސިކް ސްކޫލުގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް އަބްދުﷲ އިބްރާހީމްއެވެ.
މި ރަސްމިއްޔާތުގައި ބްރިގޭޑިއަރ ޖެނެރަލް ޢަބްދުﷲ އިބްރާހީމް ވަނީ އަސާސީ ތަމްރީނު ކޯހުގެ ބައިވެރިންނާއި އަދި މުދައްރިބުންނާ މުހާތަބުކުރައްވައި ވާހަކަފުޅު ދައްކަވާފައެވެ.
ކޮމާންޑިންގ އޮފިސަރުގެ ވާހަކަފުޅުގައި އަސާސީ ތަމްރީނު ކޯހުގެ ބައިވެރިންނަށް މަރުހަބާ ދެންނެވިއެވެ. އަދި ސިފަވަންތަ ހަރުދަނާ ސޯލްޖަރުންގެ ގޮތުގައި ދެމިތިބުމަށާއި، މި ތަމްރީނުން ފާސް ވުމަށް ގަދައަޅައި މަސައްކަތްކުރުމަށް ދަރިވަރުންނަށް އިލުތިމާސް ކުރެއްވިއެވެ.
މީގެ އިތުރުން މުދައްރިބުން ދަރިވަރުންގެ ސަލާމަތަށް ބަލައިގެން ތަމްރީނުގެ ހުރިހާ މަރުހަލާއެއް ކުރިއަށްގެންދެވުމަށް ވެސް އިލްތިމާސް ކުރެއްވިއެވެ. މި ރަސްމިއްޔާތުގައި މުދައްރިބުންނަށް ވައުދު ލައިދިނުމާއި، ދަރިވަރުންނަށް އިގުރާރު ލައިދެއްވުން އޮތެވެ. ކޯހުގެ ދަރިވަރުންނަށް އިޤުރާރު ލައިދެއްވީ ޝަހީދު އަލިރަސްގެފާނު ކޮމްޕެނީގެ ކޮމްޕެނީ ކޮމާންޑަރ، މޭޖަރ އަހްމަދު ޝަފީއުއެވެ. އަދި މުދައްރިބުންނަށް ވައުދު ލައިދެއްވީ އެމްއެންޑީއެފް ދަ ބޭސިކް ސްކޫލުގެ ކޮމާންޑިންގ އޮފިސަރ، ލެފްޓިނެންޓް ކާނަލް އަހްމަދު ޒައީމެވެ.
71 ވަނަ އަސާސީ ތަމްރީނު ކޯހުގައި 130 ދަރިވަރުން ހިމެނޭ އިރު އޭގެ ތެރޭގައި 17 އަންހެން ދަރިވަރުން ވެސް ހިމެނެއެވެ. މި ރަސްމިއްޔާތުގައި ސީޑީއެސްއެސްގެ ޑެޕިއުޓީ ކޮމާންޑިންގ އޮފިސަރ، ލެފްޓިންނެޓް ކާނަލް ޔޫސުފް ރަޝީދުގެ އިތުރުން ސީނިއަރ އެހެނިހެން ރޭންކުތަކުގެ ބޭފުޅުން ބައިވެރިވެލެއްވިއެވެ.
