ނެޝެނަލް ޑްރަގް އެޖެންސީ (އެންޑީއޭ) ގައި މަސައްކަތް ކުރުމުގެ އިންޓަރންޝިޕް ފުރުސަތު ހުޅުވާލަން ނިންމާފައިވާ ކަމަށް އެންޑީއޭގެ ޗެއަރ ޕަރސަން ލުބްނާ މުޙައްމަދު ޒާހިރު ވިދާޅުވެއްޖެއެވެ.
އިސްކަންދަރުކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ލުބްނާ ވިދާޅުވީ މި ސަރުކާރުން އެންޑީއޭގެ މަސައްކަތްތަކާ ހަވާލުވިއިރު އެ އިދާރާގައި މަސައްކަތްކުރާނެ ސައިކެޓްރިސްޓެއް ވެސް ނެތް ކަމަށެވެ. އެކަމަކު މިހާރު އެކަމަށް ކުރި މަސައްކަތުން މަސައްކަތް ކުރާނެ އިތުރު މުވައްޒަފުންނާއި ދެ ސައިކެޓްރިސްޓުން ވެސް ހޯދިފައިވާކަން ލުބްނާ ފާހަގަކުރެއްވިއެވެ.
ލުބްނާ ވިދާޅުވީ އޯލެވެލް އަދި އޭލެވެލް ހަދާފައިވާ ކުދިންނަށް އެންޑީއޭގައި އިންޓަރންޝިޕްގެ ފުރުސަތު އަންނަ ހަފްތާތެރޭގައިި ހުޅުވާލާނެ ކަމަށެވެ. އަދި ސައިކޮލިޖީގެ ދާއިރާއިން މަތީ ތައުލީމް ހާސިލްކުރަން ބޭނުންވާ އަދި މިހާރު ކުރަމުން އަންނަ ފަރާތްތަކަށް ވެސް މި ފުރުސަތުގައި ބައިވެރިވެވޭނެ ކަމަށް ލުބްނާ ވިދާޅުވިއެވެ.
މީގެ އިތުރުން، ޗެއަރޕަރސަން ލުބްނާ ވިދާޅުވެފައިވަނީ، ޕިއަރ ތެރަޕިސްޓުންނާއި ޕިއަރ ރިކަވަރީަވަރީ މެންޓަރުންގެ ދައުރު އެންޑީއޭގެ މަސައްކަތުގައި ވަރަށް މުހިންމު ކަމަށެވެ. އަދި އޯލެވެލް، އޭލެވެލް ނުވަތަ ޑިގްރީ ފެންވަރުގެ ތަޢުލީމު ހާސިލުކޮށްފައިވާ ޒުވާނުން، ވަޒީފާގެ ތަޖުރިބާ ހޯދުމަށްޓަކައި އެންޑީއޭއާ ގުޅުމަކީ އެކަމަނާގެ އުންމީދެއް ކަމުގައި ފާހަގަކުރައްވާފައިވެއެވެ.
ލުބްނާ އިތުރަށް ވިދާޅުވެފައިވަނީ، މިފަދަ ގޮތަކަށް އެންޑީއޭއާ ގުޅޭ ޒުވާނުންނަށް، މުސްތަޤުބަލުގައި ވަޒީފާގެ އިތުރު ފުރުޞަތުތަކަށް ދާއިރު ފައިދާހުރި އިތުރު ތަމްރީނުތަކެއް ލިބިގެންދާނެ ކަމަށެވެ. އަދި ވަޒީފާގެ ތަޖުރިބާ ހޯދުމަށް ނެޝަނަލް ޑްރަގް އެޖެންސީއާ ގުޅޭ ޒުވާނުންނަށް، ދިރިއުޅުމުގެ އެކި ދާއިރާތަކުގައި ކުރިއަށްދާއިރު ބޭނުންތެރި ތަމްރީނުތަކެއް ލިބިގެންދާނެ ކަމަށް ވިދާޅުވެފައިވެއެވެ. މި ފުރުޞަތަށް ހުރިހާ ޒުވާނުންނަށްވެސް މަރުޙަބާ ކިޔާ ކަމަށް ލިބުނާ ވަނީ ފާހަގަކުރައްވާފައެވެ.
އިންޓަރޝިޕަށް ހުޅުވާ ދާއިރާތަކުގެ ތެރޭގައި ލީގަލް އެސިސްޓަންޓުންނާއި ކައުންސިލަރުންގެ އެސިސްޓަންޓުން ވެސް ހިމެނޭކަން ފާހަގަކުރައްވާ ލުބްނާ ވަނީ ޒުވާނުންނަށް މި ދާއިރާއިން މަތީ ތައުލީމް ހާސިލްކުރުމަށް ގޮވާލައްވާފައެވެ.
