ބަނގްލަދޭޝްގެ ބޮޑު ވަޒީރު މަގާމުން ބޭލި މީހުން މިހާރު، އެޤައުމުގެ ރައީސްގެ ފަހަތުން ދުއްވައިގެންފިއެވެ.
ބަނގްލަދޭޝްގައި ޤާނޫނީ ހަމަތަކުގެ މަތިން އައްޔަންކޮށްފައިވާ އެގްޒެކްޓިވް ބާރުގެ ވެރިޔާ، ރައީސް ޝިހާބުއްދީންއާ ދިމާކޮށްފައި ވަނީ، ކިޔަވާ ކުދިންގެ ހަރަކާތުންނާއި ކުރީގެ އިދިކޮޅު ޕާޓީ ބީއެންޕީންނެވެ.
ރައީސް ޝިހާބުއްދީން އާއެކު މީޑިއާއިން ބޭއްވި ބަސްދީގަތުމެއްގައި ވަނީ ޝެއިޚު ހަސީނާގެ އިސްތިއުފާއާ ގުޅޭ ގޮތުން ސުއާލުކޮށްފައެވެ. ބަނގްލަދޭޝްގެ ރައީސް ވިދާޅުވީ، ޝެއިޚު ޙަސީނާގެ އިސްތިޢުފާއާ ބެހޭ އެއްވެސް ލިޔެކިޔުމެއް ފެންނާން ނެތް ކަމަށެވެ.
ނަމަވެސް، ހަސީނާ ފިއްލަވައިގެން އިންޑިއާއަށް ވަޑައިގަތުމުން، ޝިހާބުއްދީން ވަނީ ހަސީނާ އިސްތިއުފާ ދެއްވިކަމަށް އިޢުލާން ކުރައްވާފައެވެ. އަދި ވަގުތީ ސަރުކާރު ހުވައި ކުރެއްވީވެސް ޝިހާބުއްދީނުގެ އިރުޝާދަށެވެ.
މިހާރު ދެ މަސް ފަހުން، އިސްތިއުފާ ސިޓީއެއް ނެތް ކަމަށް ޝިހާބުއްދީން ވިދާޅުވުމުން ކިޔަވާ ކުދިން ވަނީ ނުރުހުން ފާޅުކޮށްފައެވެ. ޝިހާބުއްދީން ވިދާޅުވެފައި ވަނީ، ވަގުތު ތަން ނުދޭތީ ހަސީނާ އިސްތިއުފާގެ ސިޓީއެއް ނުފޮނުއްވަނީ ކަމަށް ލަފާ ކުރެއްވޭ ކަމަށެވެ.
ކިޔަވާ ކުދިންގެ ލީޑަރުންނާއި އިދިކޮޅު ބިއެންޕީން ތަފާތު އެކި ތަންތާނގައި ދީފައިވާ ސްޓޭޓްމެންޓްތަކުގައި ބުނެފައި ވަނީ ރައީސް ޝިހާބުއްދީން އިތުރުފުޅު ހައްދަވަނީ ކަމަށެވެ. އަދި ކުރީ ސަރުކާރު ވައްޓާލި ކިޔަވާ ކުދިންގެ ލީޑަރުން ވަނީ ޝިހާބުއްދީނާ މެދު ހަދަން ޖެހޭ ގޮތެއް އެމީހުން ނިންމާނެ ކަމަށް ބުނެފައެވެ.
ޝިހާބުއްދީން ވަނީ ހަސީނާގެ އިސްތިއުފާގެ މައްސަލަ ސިޔާސީ މައްސަލައަކަށް ނުހެދުމަށާއި ބައިބައިވުން އުފެއްދުމަށް މަސައްކަތް ނުކުރުމަށް ގޮވާލައްވާފައެވެ.
