ކޮޕް 29 ގައި ބައިވެރިވާ ޒުވާން ބައިވެރިންނާ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ބައްދަލުކުރައްވައިފިއެވެ.
މި ބައްދަލުވުމުގައި މިނިސްޓަރ ޠާރިޤް، ކޮޕް 29 އާ ގުޅޭގޮތުން ޒުވާނުންގެ ތަސައްވުރާއި އިސްކަންދޭ ކަންތައްތަކަށް އަޑުއައްސަވާފަވާކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން މަޢުލޫމާތުދެއެވެ.
ވަޒީރު ޠާރިޤް ވިދާޅުވީ މޫސުމަށް އަންނަ ބަދަލުތަކާ ގުޅޭ މަސައްކަތްތަކުގައި ޒުވާނުންގެ ޚިޔާލުތަކާއި ވިސްނުންތައް ހިމެނުމަކީ ވަރަށް މުހިންމު ކަމެއް ކަމުގައެވެ. އަދި ކުރިއަށް އޮތް ޖީލުތަކަށް ދެމެހެއްޓެނިވި މުސްތަޤުބަލެއް ކަށަވަރުކުރުމަށްޓަކައި ޒުވާނުންގެ ބައިވެރިވުން މުހިންމުކަން އެމަނިކުފާނު ފާހަގަކުރެއްވިއެވެ.
ކޮޕް 29 ގައި ބައިވެރިވާ ޒުވާން ބައިވެރިން މި ބައްދަލުވުމުގައި ފާޅުކުރި ޚިޔާލުތަކުގެ ތެރޭގައި މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމުގައި ޒުވާނުންގެ ބައިވެރިވުން އިތުރުކުރުމާއި، ތިމާވެށި ރައްކާތެރިކުރުމަށް އަމާޒުކޮށްގެން ޒުވާނުންނަށް ވަޒީފާގެ ފުރުސަތުތައް އިތުރުކުރުން ހިމެނެއެވެ.
ކޮޕް 29 އަށް ތައްޔާރުވުމުގެ މަޤްޞަދުގައި ބޭއްވުނު މި މުހިންމު ބައްދަލުވުމަކީ، ޒުވާނުންގެ އަޑު އުފުލި، އެ ފަރާތްތަކުގެ ޚިޔާލާއި ފިކުރު ފާޅުކުރުމުގެ ފުރުޞަތު ލިބިގެންދިޔަ މަންޞައެކެވެ. އަދި މިފަދަ ބައްދަލުވުންތަކުން ޒުވާނުންގެ ހިޔާލުތައް ސިޔާސަތު އެކުލަވާލުމުގައި ހިމެނިގެންދާނެ ކަމަށް އުންމީދުކުރެވެއެވެ.
