ރޯމްގައި މިމަހުގެ 21 އިން 25 އަށް ކުރިއަށް ގެންދާ ކޮމިޓީ އޮން ވޯލްޑް ފުޑް ސެކިޔުރިޓީ ބައްދަލުވުމުގައި ބައިވެރިވެވަޑައިގަތުމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު، ޑރ. އައިޝަތު ރަމީލާ އިޓަލީ ވިލާތަށް ކުރައްވަމުން ގެންދަވާ ދަތުރު ފުޅުގެ ތެރެއިން އިޓަލީގެ ލާޒިއޯގެ ރީޖަންގެ ރައީސް އެންޓޮނެއްލޯ އޮރިގެއްމާ އާއި އިއްޔެ ބައްދަލު ކުރައްވައިފިއެވެ.
އިޓަލީގެ ގަޑިން އިއްޔެ 15:00 ގައި މިބައްދަލުވުން ބާއްވާފައިވަނީ ލާޒިއޯ ރީޖަންގެ މައި އިދާރާގައެވެ. އިޓަލީ ވިލާތް ބެހިގެންވަނީ 20 ރީޖަންއަކަށެވެ. ލާޒިއޯ އަކީ އިޓަލީގެ ވެރިކަން ކުރާ ރޯމް ހިމެނޭ ރީޖަންއެވެ. ރޯމްއާއެކު 4 ސިޓީއެއް ލާޒިއޯ ރީޖަންގައި ހިމެނެއެވެ.
ރާއްޖޭގެ ދަނޑުވެރިކަން ތަރައްޤީކުރުމަށް އިޓަލީ ވިލާތުން، ޚާއްޞަކޮށް ލާޒިއޯ ރީޖަންގެ މައި އިދާރާ މެދުވެރިވެގެން އެހީތެރިކަން ފޯރުކޮށްދެވޭނެ ދާއިރާތަކާއި ގުޅޭ ގޮތުން މިބައްދަލުވުމުގައި ވަނީ މަޝްވަރާކޮށްފައެވެ.
ދަނޑުވެރިކަމުގެ ދާއިރާއިން މީހުން ބިނާކުރުމާއި، ދަނޑުވެރިކަމަށް ބޭނުންކުރާ ފެނާއި ބިމުގެ ވަޞީލަތްތައް އެންމެ އެކަށީގެންވާ ގޮތުގައި ބޭނުންކޮށްގެން، ރާއްޖޭގެ ބިމުން ދަނޑުވެރިކަމަށް ބޭނުންކުރެވެންހުރި ބިންކޮޅުގެ އެންމެ ފުރިހަމަ ބޭނުން ހިފައި، ރާއްޖެއަށް އިމްޕޯޓްކުރާ، ދަނޑުވެރި އުފެއްދުންތައް މަދު ކުރެވޭ މިންވަރަށް ޤައުމުގެ ދަނޑުވެރި އުފެއްދުންތެރިކަން އިތުރުކުރުމަކީ ސަރުކާރުގެ ވަރަށް މުހިންމު ލަނޑުދަނޑިއެއް ކަމަށާއި މިލަނޑުދަނޑި ޙާޞިލްކުރުމަށް އެއްވެސް ފުރުޞަތެއް އޮތްނަމަ އެފުރުޞަތެއްގެ ބޭނުން އެންމެ ފުރިހަމަ ގޮތެއްގައި ހިފަން ބޭނުންވާކަން މިނިސްޓަރ ވަނީ ފާހަގަ ކުރައްވާފައެވެ.
ދިވެހިރާއްޖެއަކީ އިޓަލީ ވިލާތުން ވަރަށް ލޯބިކުރާ މަންޒިލެއްކަމަށާއި، ދިވެހިރާއްޖެއަށް އެއްވެސް ސިފައެއްގައި އެހީތެރިކަމެއް ފޯރުކޮށްދެވުމަކީ ލިބޭ ޚާއްޞަ އުފަލެއް ކަމަށް ލާޒިއޯ ރީޖަންގެ ރައީސް ވަނީ ވިދާޅުވެފައެވެ. މިނިސްޓަރ އެދިވަޑައިގެންނެވި ފަދައިން، ދަނޑުވެރިކަމުގެ ދާއިރާއިން ރާއްޖޭގައި އިންސާނީ ވަޞީލަތްތައް ތަރައްޤީކުރުމަށް ވެދެވޭ އެހީތެރިކަމެއްގެ ގޮތުން ދަނޑުވެރިކަމުގެ އެކި ދާއިރާތަކުން މަތީ ތަޢުލީމު ޙާޞިލް ކުރުމަށް 2025 ވަނަ އަހަރު ދިވެހި ރާއްޖެއަށް އިޓަލީ ވިލާތުން ސްކޮލަޝިޕް ހަމަޖައްސަވައިދެއްވާނެ ކަމަށް ވަނީ ވިދާޅުވެފައެވެ.
ލާޒިއޯ ރީޖަންއަކީ ބައިނަލްއަޤްވާމީ މައިދާނުގައި، ދަނޑުވެރިކަން ހިމެނޭ ގޮތަށް އެކި ދާއިރާތަކުން އިންވެސްޓްކުރަން ޝަޢުޤުވެރިވާ ގިނަ އަދަދެއްގެ ކުންފުނިތަކެއް ޙަރަކާތްތެރިވާ ރީޖަންއެއް ކަމަށާއި މިނިސްޓަރގެ ވާހަކަފުޅުގައި އެހީތެރިކަން ބޭނުންވާ ދާއިރާ ތަކުގެ ތެރޭގައި ފާހަގަކުރައްވާފައިވާ، ޕޯލްޓްރީ ފަދަ މަސައްކަތްތަކަށް އިންވެސްޓް ކުރަން ޝަޢުޤުވެރިވާ ވިޔަފާރި ކުންފުނިތައް އޭގެ ތެރޭގައި ހިމެނޭކަމަށް ރައީސް ވަނީ ވިދާޅުވެފައެވެ. ދަނޑުވެރިކަމުގެ މަސައްކަތްތަކުގައި ފުޅާދާއިރާއެއްގައި އިންވެސްޓްކުރަން ޝައުޤުވެރިވާ ރާއްޖޭގެ ކުންފުނިތަކާއި ލާޒިއޯ ރީޖަންގެ ކުންފުނިތަކާއެކު ރާއްޖޭގައި ނުވަތަ އިޓަލީގައި ބައްދަލުކޮށް މަޝްވަރާކުރެވޭނެ މަގެއް ފަހިކޮށްދެއްވާނެކަމަށްވެސް މިބައްދަލުވުމުގައި ލާޒިއޯ ރީޖަންގެ ރައީސް ވަނީ ވިދާޅުވެފައެވެ.
މިނިސްޓަރ އެދިވަޑައިގެންނެވި ކަންކަމަށް ރައީސްގެ ފަރާތުން ވަގުތުން ގޮތް ނިންމަވައި ދެއްވީތީ މިނިސްޓަރ ވަނީ ލާޒިއޯ ރީޖަންގެ ރައީސަށް ޝުކުރު ދަންނަވާފައެވެ. އަދި މި ބައްދަލުވުމުގައި ނިންމުނު ކަންކަމަށް އަމަލީ ސިފައެއް ގެނައުމަށް ދިވެހިރާއްޖެއިން ކުރަންހުރި ކަންކަން ފުރިހަމަކޮށްދޭނެކަމުގެ ޔަޤީންކަން މިނިސްޓަރ ވަނީ ދެއްވާފައެވެ.
ޚަބަރު: މިނިސްޓްރީ އޮފް އެގްރިކަލްޗަރ އެންޑް އެނިމަލްވެލްފެއަރ
