ދުނިޔޭގެ ފެންވަރުގައި ކަނޑުގެ ވެށި ޙިމާޔަތް ކުރުމުގެ މުހިންމުކަމާ ބެހޭ ގޮތުން، ރައްޔިތުންގެ މަޖިލީހުގެ ނާއިބް ރައީސް އަޙުމަދު ނާޡިމް ވާހަކަފުޅު ދައްކަވައިފިއެވެ.
ޝާންޑޮންގްގެ ގަވަރުނަރު ބޭއްވެވި ރިސެޕްޝަންގައި ވާހަކަފުޅު ދައްކަވަމުން، އޮނަރަބަލް އަޙުމަދު ނާޘިމް ވަނީ، ކަނޑުގެ ވެށި ކިލަނބުވުމަށް މެދުވެރިވާ ކަންތައްތަކުން ކަނޑުގެ ވެށި ސަލާމަތް ކުރުމަށް، ބައިނަލްއަޤްވާމީ ފެންވަރުގައި ގުޅިގެން މަސައްކަތް ކުރުމަށް ގޮވާލައްވާފައެވެ.
އޮނަރަބަލް އަޙުމަދު ނާޡިމް ޗައިނާއަށް ކުރައްވާ ދަތުރުފުޅަކީ، ގްލޯބަލް އޯޝަން ޑިވެލޮޕްމަންޓް ފޯރަމްގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެކެވެ.
ގްލޯބަލް އޯޝަން ޑިވެލޮޕްމަންޓް ފޯރަމްގައި ބައިވެރިވެ ވަޑައިގަންނަވާ މަންދޫބުންނަށް ޝާންޑޮންގްގެ ގަވަރުނަރު އިންތިޒާމު ކުރެއްވި ރިސެޕްޝަންގައި ވާހަކަފުޅު ދައްކަވަމުން، އޮނަރަބަލް ނާޡިން ވިދާޅުވީ، ރާއްޖެއާއި ޗައިނާއަކީ، ކަނޑުގެ ވެށި ހިމާޔަތް ކުރުމަށް މުހިންމު މަސައްކަތްތަކެއް ކުރާ ދެ ޤައުމު ކަމަށެވެ.
އެ ރިސެޕްޝަނުގެ ޗީފް ގެސްޓަކީ އޮނަރަބަލް ނާޡިމް އެވެ.
"ކަނޑަކީ، އަޅުގަނޑުމެން ޙިއްސާކުރާ ކުރިމަގުގެ އެންމެ އަސާސީ ބައި" އޮނަރަބަލް ނާޡިމް ވިދާޅުވިއެވެ. އަދި ކަނޑު ކިލަނބުކުރުމާއި، މަސްމަހާމެހި ނެތިގެންދާ މިންވަރަށް އިތުރަށް މަސްވެރިކަން ކުރުމާއި، ކަނޑުގެ ލޮނޑުގަނޑު ތަޣައްޔަރު ކުރާ ފަދަ ކަންތައްތަކުން ކަނޑުގެ ވެށި ސަލާމަތްކުރުމަށް، ދުނިޔޭގެ ފެންވަރުގައި އެންމެ ގުޅިގެން މަސައްކަތް ކުރުމުގެ މުހިންމު ކަމަށްވެސް އޮނަރަބަލް ނާޡިމް އަލިއަޅުވައި ލެއްވިއެވެ.
އޮނަރަބަލް ނާޡިމްގެ ވާހަކަފުޅުގައި ޝާންޑޮންގް ޕްރޮވިންސްގައި ވެށި ހިމާޔަތް ކުރުމަށް ކުރިއަށްގެންދާ އިސްނެގުންތަކަށް ތަޢުރީފް ކުރެއްވިއެވެ. އެގޮތުން ޝާންޑޮންގްގެ މެރިން އިކޮލޮޖިކަލް ޕްރެޒަވޭޝަންގެ 31 މަޝްރޫޢާއި ސާފު ހަކަތަ އުފެއްދުމަށް ކުރިއަށް ގެންދާ މަޝްރޫޢުތަކަށް ތަޢުރީފު ކުރައްވަމުން އެއީ، "ރާއްޖެފަދަ ޤައުމުތަކަށް ނަމޫނާއެއް" ކަމަށް ވިދާޅުވިއެވެ.
އޮނަރަބަލް ނާޡިމް ވަނީ، 2025ގައި ބާއްވާ އދގެ އޯޝަން ކޮންފަރެންސްގެ ކުރިން ޤައުމުތަކުން ކަނޑުތައް ޙިމާޔަތް ކުރުމަށް އަތުގުޅާލުމަށް ގޮވާލައްވާފައެވެ.
