ޕާކިސްތާންގެ އެކިއެކި ތައުލީމީ މުއައްސަސާތަކުގެ ދަރިވަރުން އިންތިޒާމްކޮށްގެން ލާހޯރުގެ ސްޓޫޑެންޓް އެކްޝަން ކޮމިޓީން ވަނީ ލާހޯރު ކޮލެޖް ފޯ ވިމެން ޔުނިވާސިޓީގެ އިތުރުން ޕަންޖާބު ކޮލެޖުގައި ވެސް ރޭޕް އާއި އަންހެން ކުދިންނާ ބެހުމުގެ ހާދިސާތައް ތަހުގީގު ކުރުމަށް ގޮވާލާ އެއްވުމެއް ބާއްވާފަ އެވެ. މިއެއްވުންތަކުގައި، ދަރިވަރުންނަށް އަނިޔާ ކުރުމުގައި ހަރަކާތްތެރިވާ ފުލުހުންނާ މެދު ފިޔަވަޅު އެޅުމަށްވެސް ގޮވާލާފައި ވެއެވެ. އަދި އެކިއެކި މުޒާހަރާތަކުން ނަގައިގެން ބަންދުކޮށްފައިވާ ހުރިހާ ދަރިވަރުން ބަންދުން ދޫކޮށްލުމަށް ވެސް ވަނީ އެދިފައެވެ.
އަންހެން ކުދިންގެ ހައްގަށް މަސައްކަތް ކުރާ ކޮމިޓީން އިންތިޒާމްކޮށްގެން ރޭޕް އާއި އަންހެނުންނާ ބެހުމާ ދެކޮޅަށް ލާހޯރުގެ ދަ މޯލްއާއި ޕަންޖާބު އެސެމްބްލީ ކުރިމަތީގައި ކުދިން ކުރިއަށް ގެންދިޔަ މުޒާހަރާތަކުގައިވެސް އެފްސީ ކޮލެޖާއި ޕަންޖާބު ކޮލެޖާއި އެލްސީޑަބްލިއުޔޫ އާއި ގެރިސަން ކޮލެޖާއި ޖީސީ ޔުނިވާސިޓީގެ ދަރިވަރުން ބައިވެރިވެފައި ވެއެވެ. އެ ދަރިވަރުންނާއެކު، ބެލެނިވެރިންނާއި، ޕަބްލިކް އަދި ޕްރައިވެޓް ސެކްޓަރުގެ މުވައްޒަފުންނާއި ރިވޮލިއުޝަނަރީ ކޮމިއުނިސްޓް ޕާޓީގެ މެންބަރުންވެސް ވަނީ މުޒާހަރާގައި ބައިވެރިވެފައެވެ.
މުޒާހަރާތަކާއި އެއްވުންތައް އިންތިޒާމު ކުރާ ފަރާތުން ބުނަނީ، 50 މިލިއަން އަންހެން ދަރިވަރުން އެކި އެކި ތައުލީމީ މުއައްސަސާތަކުގައި ކިޔަވަމުންދާ ކަމަށާއި އެމީހުން އުޅެމުންދަނީ ބިރުވެރިކަމާއި އަމާންކަން ނެތް މާހައުލެއްގައި ކަމަށެވެ. އަދި އެފަރާތްތަކުގެ ހައްގާއި މިނިވަންކަމާއި އަމާންކަން ކަށަވަރު ކުރެވޭ ގޮތަކަށް އަންހެނުންނާއި ބެހުމުގެ ކަންކަން ހައްލުކުރުމަށް އަވަސް ފިޔަވަޅުތަކެއް އެޅުމަށް އެފަރާތްތަކުން ސަރުކާރަށް ގޮވާލިއެވެ.
