އިޒްރޭލުން އިރާނަށް އިއްޔެ ދިން ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ޙާރިޖީ ވުޒާރާއިން ނެރުނު ބަޔާނެއްގައި ސަރުކާރުން ވިދާޅުވީ މި ހަމަލާއަކީ އިރާނުގެ ސިޔާދަތަށާއި ބައިނަލްއަޤްވާމީ ޤާނޫނުތަކަށް އަރައިގަތުމެއް ކަމަށެވެ.
ސަރުކާރުން ގޮވާލާފައިވަނީ މި ސަރަޙައްދުގެ ޤައުމުތަކާއި ރައްޔިތުންގެ ސަލާމަތަށް ނުރައްކާވެފައިވާ މި ހަނގުރާމަވެރި ޙާލަތު ވަގުތުން ހަމަޖެއްސުމަށެވެ. އަދި ހުރިހާ ފަރާތްތަކަކަށްވެސް ގޮވާލާފައިވަނީ ވީހާވެސް ބޮޑަށް ކެތްތެރިކަން ދައްކައި، ޙާލަތު މަޑުޖެއްސުމަށް މަސައްކަތްކޮށް، ބައިނަލްއަޤްވާމީ ޤާނޫނުތަކަށް ޙުރުމަތްތެރިކޮށް ހިތުމަށެވެ.
މީގެ އިތުރުން، ދިވެހި ސަރުކާރުން ވަނީ މި ހަނގުރާމަވެރި ޙާލަތު ވަގުތުން ހުއްޓުވުމަށް ބޭނުންވާ ހުރިހާ ފިޔަވަޅެއް އެޅުމަށާއި، މި ސަރަޙައްދުގައި ދެމެހެއްޓެނިވި ސުލްޙަ ޤާއިމުކުރުމަށް މަސައްކަތްކުރުމަށް ބައިނަލްއަޤްވާމީ މުޖުތަމަޢުއަށް ގޮވާލާފައެވެ. ޒަޔަނިސްޓުން 3 ރާޅަކަށް ދިން މި ޙަމަލާތަކަކީ އޮކްޓޫބަރު 1 ވަނަ ދުވަހު އީރާނުން އިޒްރޭލުގެ އަސްކަރީ އަމާޒުތަކަށް ދިން ޙަމަލާތަކުގެ ބަދަލު ހިފުމުގެ ގޮތުން ދީފައިވާ ޙަމަލާތަކެކެވެ. މި ޙަމަލާތައް ދިނުމަށްފަހު އިޒްރޭލުންވަނީ ޙަމަލާތަކުގެ ރައްދު ނުދިނުމަށް އީރާނަށް ގޮވައިލާފައެވެ.
