ޔޫރަޕްގައި ނަސްލީ ތަފާތުކުރުމުގެ ތަޖުރިބާތައް ރިޕޯޓްކުރާ މުސްލިމުންގެ ނިސްބަތް 2016 ވަނަ އަހަރުގައި 39 ޕަސެންޓްގައި އޮތުމަށްފަހު، 2022ގައި 47 ޕަސެންޓަށް އިތުރު ވެފައިވާ ކަމަށް އީޔޫގެ އެޖެންސީ ފޯ ފަންޑަމަންޓަލް ރައިޓްސް (އެފްއާރުއޭ) އިން ރިޕޯޓްކޮށްފިއެވެ.
ވިލާތު އިއްތިހާދުގެ މެމްބަރު ގައުމުތަކުގެ މުސްލިމުންގެ ދެބައިކުޅަ އެއްބައި މީހުންނަށް އާންމު ދިރިއުޅުމުގައި ތަފާތުކުރުމާއި ނަފްރަތު ކުރުމާ ކުރިމަލާން ޖެހޭ ކަމަށް ބުނަމުން ދެއެވެ.
އީޔޫގެ 13 މެމްބަރު ގައުމަކުން 9،600 މުސްލިމުން ބައިވެރި ކޮށްގެން ކުރި ދިރާސާގައި އެފްއާރުއޭ އިން ބުނަނީ މުސްލިމުންނާ މެދު ނަސްލީ ތަފާތުކުރުންތައް ވަރަށް ބޮޑަށް އިތުރުވެފައިވާ ކަމަށް ފެންނަކަމަށެވެ.
މި ދިރާސާއިން ހާމަވާ ގޮތުގައި ތަފާތުކުރުމުގެ ވާހަކަތަކާއި އަމަލުތަކުގެ ސަބަބުން ޔޫރަޕްގެ މުސްލިމުންގެ ކޮންމެ ދުވަހުގެ ދިރިއުޅުމުގެ ހުރިހާ ދާއިރާއަކަށް އަސަރުކޮށް، ވަޒީފާއާއި ތައުލީމާއި ބޯހިޔާވަހިކަމާއި ވިޔަފާރީގައި ގޮންޖެހުންތައް ކުރިމަތި ވެއެވެ.
ސެޕްޓެމްބަރު 2021 އާއި އޮކްޓޯބަރު 2022 އާ ދެމެދު ކުރިއަށް ގެންދިޔަ މި ދިރާސާގައި އީޔޫގެ އެކި މެމްބަރު ގައުމުތަކުގައި ދިރިއުޅޭ މުސްލިމުން ބައިވެރި ކޮށްފައި ވެއެވެ. އޭގެ ތެރޭގައި އޮސްޓްރިއާ، ބެލްޖިއަމް، ޑެންމާކް، ފިންލޭންޑް، ފްރާންސް، ޖަރުމަން، ގްރީސް، އަޔަލޭންޑް، އިޓަލީ، ލަކްޒަމްބަރގް، ނެދަލެންޑްސް، ސްޕެއިން، އަދި ސްވިޑެން ހިމެނެ އެވެ.
