ތަރިންގެ މައްޗަށް އެކުލެވޭ މަޝްހޫރު ރެއާލް މެޑްރިޑް، އެކްލަބުގެ ސަޕޯޓަރުންނަށް ހަޖަމް ކުރަން އުނދަގޫވާ ވަރުގެ ބައްޔަކުން ވާދަވެރި ބާސެލޯނާ އަތުން މިރޭ ބަލިވެއްޖެއެވެ.
އަމިއްލަ ދަނޑުގައި ބާސެލޯނާ އަތުން ރެއާލް ބަލިވީ 4-0 ގެ ބޮޑު ތަފާތަކުންނެވެ.
ޒުވާން ކުޅުންތެރިންގެ މައްޗަށް އެކުލެވޭ ބާސެލޯނާ ހަތަރު ލަނޑުވެސް ޖެހީ ދެވަނަ ހާފުގައެވެ. ފުރަތަމަ ލަނޑާއި ދެވަނަ ލަނޑު ކާމިޔާބު ކޮށްދިނީ ތަޖުރިބާކާރު ފޯވާޑް ރޮބާޓް ލެވަންޑޮސްކީއެވެ. އެއީ 54 އަދި 56 ވަނަ މިނެޓުގައެވެ. ބާސެލޯނާގެ ތިންވަނަ ލަނޑު 77 ވަނަ މިނެޓުގައި ކާމިޔާބު ކޮށްދިނީ އުމުރުން އެންމެ 18 އަހަރުގެ ވިންގަރ ލަމީން ޔަމާލްއެވެ. ބާސެލޯނާގެ ހަތަރުވަނަ ލަނޑު 84 ވަނަ މިނެޓުގައި ކާމިޔާބު ކޮށްދިނީ ކެޕްޓަން ރަފީނާއެވެ.
މިމެޗުގައި ރެއާލްގެ މަޝްހޫރު ތަރިން ކަމުގައިވާ ކިލިއަން އެމްބައްޕޭ އާއި ވިނީޝިއަސް ޖޫނިއަރއަށް ލަނޑު ޖަހާނެ ރަނުގެ އެތައް ފުރުސަތެއް ލިބުނެވެ. އެމްބައްޕޭ ފޮނުވާލި ދެ ހަމަލާއެއް ގޯލަށް ވަންނަންވެސް ވަނެވެ. އެކަމަކު ދެލަނޑުވެސްވީ އޮފްސައިޑެވެ. މިމެޗުގައި ބާސެލޯނާގެ ކުޅުންތެރިންގެ އޮފްސައިޑުން މަޅިން ރެއާލްގެ ކުޅުންތެރިންނަށް ނުނެއްޓެވިގެން އުޅުނު މަންޒަރުވެސް ވަރަށް ބޮޑަށް ފެނުނެވެ.
އަނެއްކޮޅުން މިއީ 2021 ވަނަ އަހަރުގެ އޮގަސްޓް މަހުގެ 5 ވަނަ ދުވަހު ބާސެލޯނާ ދޫކޮށް ލިއޮނަލް މެސީ ދާން ޖެހުނު ފަހުން، މިހާތަނަށް ކުޅުނު އެންމެ ފޯރިގަދަ އެލް ކްލެސިކޯކަން ފާހަގަ ކޮށްލެވެއެވެ.
މިމެޗުން ބާސެލޯނާ މޮޅުވުމާއެކު ލަލީގާ ތާވަލުގެ ކުރީގައި އެ ކްލަބު އޮތީ 30 ޕޮއިންޓާއެކުއެވެ. ދެވަނައިގައި ރެއާލް އޮތީ 24 ޕޮއިންޓާއެކުއެވެ. ތިންވަނައިގައި އޮތް ވިޔަރެއާލްއަށް ލިބިފައި ވަނީ 21 ޕޮއިންޓެވެ.
