މީސްމީޑިއާގެ ކޮންޓެންޓް ކްރިއޭޓަރުންނާއި އިންފުލުއެންސަރުން އެމީހުންގެ އޯޑިއެންސަށް މައުލޫމާތު ހުށަހަޅާއިރު އޭގެ ތެދު ދޮގު ނުބަލާކަން މިހާރު ކަށަވަރު ވެއްޖެއެވެ.
"ބިހައިންޑް ދަ ސްކްރީންސް" ގެ ނަމުގައި ޔުނެސްކޯއިން ނެރެފައިވާ ރިޕޯޓަކީ ޑިޖިޓަލް ކޮންޓެންޓް އުފައްދާ މީހުންގެ ކަންކަން ހުންނަގޮތާއި ފެންވަރު ދިރާސާކުރި ރިޕޯޓެކެވެ. އަދި މިއީ ދުނިޔޭގެ ފެންވަރުގެ މިފަދަ ފުރަތަމަ ތަހުލީލުކަމަށްވެސް ޔުނެސްކޯގެ ނޫސްބަޔާނުގައިވެ އެވެ.
އެމެރިކާގެ އޮހައިއޯގެ ބައުލިން ގްރީން ސްޓޭޓް ޔުނިވާސިޓީގެ ޚާއްސަ ރިސާޗް ޓީމެއްގެ ތަޖުރިބާއާއެކު 45 ގައުމެއްގެ 500 އިންފްލޫއެންސަރުން ވަނީ ޔުނެސްކޯގެ މި ދިރާސާގައި ބައިވެރިވެފަ އެވެ.
މިދިރާސާއަށް ކުރި ސާވޭގައި ބައިވެރިވި ޑިޖިޓަލް ކޮންޓެންޓް އުފައްދާ މީހުންގެ ތެރެއިން 62 ޕަސެންޓް މީހުން ވަނީ "އެމީހުންގެ އޯޑިއަންސްއާ ހިއްސާ ކުރުމުގެ ކުރިން އެމީހުން ހުށަހަޅާ މައުލޫމާތުގެ ތެދު ދޮގު ޔަގީން ނުކުރާ ކަމަށް އެއްބަސްވެފަ އެވެ."
"ބިހައިންޑް ދަ ސްކްރީންސް.... ސާވޭއިން ސްކްރީންގްރޭބް." ގެ ނަމުގައި އެކުލަވާލާފައިވާ ދިރާސާ ޔުނެސްކޯއިން އާންމު ކޮށްފައި ވަނީ ނޮވެމްބަރު 26 ގައެވެ.
މި ރިޕޯޓުން ފާހަގަވާ ގޮތުގައި 33.5 ޕަސެންޓް އިންފުލުއެންސަރުން /ކޮންޓެންޓް ކްރިއޭޓު ކުރާ މީހުން އެމީހުންނަށް މައުލޫމާތު ދޭމީހުންގެ ސައްހަކަންވެސް ކަށަވަރެއް ނުކުރެއެވެ. އަދި 37 ޕަސެންޓް މީހުން ވަނީ އެމީހުން ހުށަހަޅާ މައުލޫމާތު އަމިއްލައަށް ޔަގީން ނުކުރާ ކަމަށްވެސް އެއްބަސްވެފައެވެ.
އިންޓަރވިއުގައި މިމީހުން ބުނެފައި ވަނީ، ޔަޤީން ނުކުރެވޭ މަޢުލޫމާތު ހިއްސާކުރުމުން ކުރިމަތިވެދާނެ ނަތީޖާތަކަށް އެމީހުން ފަރުވާލެއް ބަހައްޓާފައި ނުވާ ކަމަށެވެ.
މި ސާވޭއިން ޔަގީން ވެގެން ދިޔައީ، ފެކްޓް ޗެކު ކުރުމަކީ މިވެރިން އާންމުކޮށް ކުރާ ކަމެއް ނޫންކަމަށާއި އަދި ކުރަންވެސް ނުދަންނަ ކަމެއް ކަމަށެވެ.
އޭގެ އިތުރުން މިމީހުންގެ 42 ޕަސެންޓް މީހުންގެ ފުށުން އެނގުނީ، މީސްމީޑިއާގެ ޕޯސްޓްތަކަށް ލިބޭ ލައިކްސްއާއި އެމީހުން ޕޯސްޓްތައް ޝެއަރ ކުރުމަކީ އެމީހުން އަމިއްލައަށް ބަލާ މިންގަނޑެއް ކަމުގައެވެ.
ގާތްގަނޑަކަށް 21 ޕަސެންޓް މީހުން ބުނެފައި ވަނީ ރައްޓެއްސަކު އެއްޗެއް ހިއްސާކޮށްފިނަމަ އެއެއްޗެއް ހިއްސާ ކުރުމުގައި އެމީހުން ފަސް ނުޖެހޭ ކަމަށެވެ.
މެއިންސްޓްރީމް މީޑިއާގައި މައުލޫމާތެއް ހިމެނުނު ކަމުގައިވިއަސް، ކޮންޓެންޓް އުފައްދާ މީހުންނަށް އެއީ ތިން ވަނައަށް މުހިންމު މަސްދަރެވެ. އެމީހުން ބޮޑަށް ބުރަ ވަނީ އަމިއްލަ މީހާއަށް ލިބޭ ނުވަތަ އޭނާއާ ހަމައަށް ފޯރާ މައުލޫމާތެވެ.
ޑިޖިޓަލް ކޮންޓެންޓް އުފައްދާ މީހުންގެ 60އާ ގާތް ކުރާ ޕަސެންޓްގެ މީހުންނަކީ، މުވާސަލާތާ ގުޅޭ ގާނޫނާއި ގަވާއިދަށް އަހުލުވެރި ބަޔެއް ނޫންކަންވެސް އެނގިގެން ދާ ކަމަށް ވެސް ޔުނެސްކޯގެ ސާވޭއިން ހާމަވެ އެވެ. އަދި 56.4 ޕަސެންޓް މީހުންނަކީ އެއްވެސް ޕްރޮގްރާމެއްގައި ބައިވެރިވެފައިވާ ބައެއް ނޫން ކަންވެސް އެނގެއެވެ.
