އެމްއެންޑީއެފް މާލޭ އޭރިއާ ކޮމާންޑުން އިންތިޒާމުކޮށްގެން ސެނެހިޔަ މިލިޓަރީ ހޮސްޕިޓަލުގެ އެހީތެރިކަމާއެކު އުމުރުން 55 އަހަރުން މަތީގެ އިސްރަށްވެހިންނަށް އަމާޒުކޮށްގެން މެޑިކަލް ކޭމްޕެއް ކުރިއަށް ގެންގޮސްފިއެވެ.
އެމްއެންޑީއެފުން ބުނީ އިއްޔެ ކުރިއަށްދިޔަ މި ކޭމްޕުގައި ހެލްތު ޗެކަޕް ހެދުމާއި، ހެލްތު ސްކްރީނިންގ ކުރިއަށް ގެންގޮސްފައިވާ ކަމަށާއި ކެންސަރާ ގުޅޭ މައުލޫމާތު ދިނުމާއި ސްކްރީން ކުރުމަށް ނަން ނޯޓުކުރުމުގެ ިދުމަތް ވަނީ ފޯރުކޮށްދިނުމުގެ އިތުރުން ސިއްހީ ދާއިރާއާ ގުޅުންހުރި މަޢުލޫމާތު ބައިވެރިނަށް ވަނީ ފޯރުކޮށްދީފައިވާ ކަމަށެވެ.
އަދި މި މެޑިކަލް ކޭމްޕަކީ އިސްރައްވެހިންނަށް ދިމާވާ ޞިއްޙީ މައްސަލަތައް އެއްތަނަކުން ދެނެގަތުމާއި، އެކަންކަމާ ގުޅޭ މައުލޫމާތު އެފަރާތްތަކަށް ފޯރުކޮށްދިނުމަށް ކުރިއަށްގެންދިޔަ ކޭމްޕެއް ކަމަށްވެސް އެމްއެންޑީއެފުން ބުނެފައިވެއެވެ.
މި ކޭމްޕުގައި ، އެމްއެންޑީއެފް މާލެ އޭރިއާ ކޮމާންޑާއި ސެނެހިޔަ މިލިޓަރީ ހޮސްޕިޓަލްގެ އިތުރުން އައިކެއަރ އޮޕްޓިކަލްސް، ދަމަނަވެށި، ހުޅުމާލެ ހޮސްޕިޓަލްގެ ވެލް ވިމަން ކްލިނިކް، މާސްޓަރ ޑެންޓަލް ކެއަރ ސެންޓަރ، ކޮމިއުނިޓީ ވޮލަންޓިއަރ ނަރސަސް އަދި އެލްޒައިމާޒް ސޮސައިޓީ އޮފް މޯލްޑިވްސްއިން ވަނީ ބައިވެރިވެފައެވެ.
އިސްރަށްވެހިންގެ ނާދީގައި ކުރިއަށް ގެންދިޔަ މި ކޭމްޕުގައި 97 ފަރާތަކުން ބައިވެރިވިއެވެ.
