ހިޒުބުﷲގެ ހަމަލަތަކުން ޓެލްއަވީވްގެ ހޮޓެލް އޮކިއުޕެންސީ ހައިރާން ކުރުވަނިވި މިންވަރަކަށް ދަށަށް ގޮސްފައިވާކަމަށް، ޓެލް އަވީވް ހޮޓެލް އެސޯސިއޭޝަނުން ބުނެއެވެ. އެ އެސޯސިއޭޝަނުން ނެރުނު އެންމެ ފަހުގެ ތަފާސްހިސާބުތަކުން ދައްކާ ގޮތުގައި އޮކިއުޕެންސީ ރޭޓް ވަނީ މިހާރު 45 ޕަސެންޓަށް ވުރެން ދަށަށް ގޮސްފައެވެ.
ޓެލްއަވީވަކީ އިޒްރޭލުގެ ވެރިރަށެވެ. މިއީ ކުރިން ކުޑަ ޔަހޫދީ އާބާދީއެކެވެ. ނަމަވެސް 1948ގައި މެޑިޓޭރޭނިއަން ކަނޑަށް އޮންނަ ފަލަސްޠީނުގެ އެންމެ ރީތި އެއް ސިޓީ ޔާފާ ހިފުމަށްފަހު އެސިޓީގެ ނަން ބަދަލުކޮށް ޓެލްއަވީވްއާ އެއްކޮށްލީ އެވެ.
ޓެލް އަވީވް ހޮޓެލް އެސޯސިއޭޝަނުގެ ސީއީއޯ އޯރެން ޑްރޯރީ ޔަހޫދީ މީޑިއާއާ ހިއްސާކުރި ގޮތުގައި މިއީ ޒަޔަނިސްޓުންގެ އުދުވާން ފެށިފަހުން އޮކިއުޕެންސީ މިހާބޮޑުކޮށް ދަށްވި ފުރަތަމަ ފަހަރެވެ. މިއީ ހިޒުބުﷲ އިން ދެމުންދާ މިސައިލާއި ޑްރޯން ހަމަލާގެ ނަތީޖާއެވެ.
ފަލަސްޠީނުގެ މިނިވަންކަމުގެ ހަނގުރާމަ 2023 ވަނަ އަހަރުގެ އޮކްޓޯބަރު މަހު ފެށިފަހުން، ގެދޮރު ދޫކޮށްދާން މަޖުބޫރުވި ގިނަ ބަޔަކު ޓެލްއަވީވްގެ ހޮޓާތަކުން ކޮޓަރި ނެގިއެވެ. އެއިރު އޮކިއުޕެންސީ 66 ޕަސެންޓުގައި އޮތެވެ.
އެ އެސޯސިއޭޝަނުން ބުނީ މިވަގުތު ޓެލް އަވީވްގެ ހޮޓަލްތަކުގައި ތިބީ އެންމެ 2،500 މީހުން ކަމަށެވެ. ހިޒުބުﷲގެ ހަމަލަތަކުން މުޅި ހޮސްޕިޓަލިޓީ އިންޑަސްޓްރީއަށް އެނގުންވެފައިވާ ކަމަށްވެސް އެފަރާތުން ބުނެއެވެ.
ޔަމަނުގެ އަންސާރުﷲ ޖަމާއަތުން ދެމުންދާ ހަމަލަތަކުން ވެސް އިޒްރޭލުން ހިފާފައިވާ އީލާތު ބަނދަރު ބަނގްރޫޓުކޮށްލައިފިއެވެ. އެތަނަށް އާގުބޯޓެއް ކައިރި ނުކުރާތީ މުވައްޒަފުން ވަޒީފާއިން ކަނޑާލައި ބަނދަރު ބަންގުޜޫޓުކޮށްފައި ވެއެވެ. އަދި އީލާތުގެ ހޮޓެލްތައްވެސް ބަންދުކޮށްފައި ވެއެވެ.
ޙިޒުބުﷲ އިން ދެކުނުގެ ބަސްތީތަކުން ޔަހޫދީން ބޭރުވެގެން ދިއުމަށް ދިން މުއްދަތު ހަމަވުމާއެކު ރެއިން ފެށިގެން އުތުރު ސަރަހައްދުތަކަށް ވެސް ހަމަލަތައް އަމާޒުކުރަން ފަށާފައި ވެއެވެ.
