ފޭރިގެންފައިވާ ރަޝިޔާގެ ފައިސާ ޔުކްރެއިންގެ ކުލީ ހަނގުރާމައަށް ހޭދަކުރުމަށް ޖީ7ގެ ގައުމުތަކުން ނިންމައިފިއެވެ. ޖީ7 ގައުމުތަކުގެ ލީޑަރުން ވަނީ ހުޅަނގުގެ ގައުމުތަކުގައި މިހާރު ފްރީޒްކޮށްފައިވާ ރަޝިޔާގެ ސޮވަރިން އެސެޓްތަކުން ލިބޭ އާމްދަނީން ޔޫކްރޭން ހަނގުރާމައަށް ބިލިއަން ޑޮލަރުގެ ލޯނުތައް ދިނުމަށް ތާއީދުކޮށްފަ އެވެ.
ކިއެވްއަށް ބިލިއަނުން ލޯނު ދިނުމަށް ހުޅަނގުން އެއްބަސްވިނަމަވެސް އެފައިސާ ހަމަނުޖެހިގެން އެއްކޮށް ދީފައެއް ނުވެއެވެ. ހުޅަނގުން ވަނީ ކިއެވް އަށް 50 ބިލިއަން ޑޮލަރު ދިނުމަށް ޖޫން މަހު ވައުދުވެފަ އެވެ.
ޔުކްރެއިންއަށް ދޭ ލޯނުތައް ދޫކުރަނީ ރަޝިޔާގެ އެސެޓްތަކާއި އެ ސެޓްތަކުން އުފެދޭ އާމްދަނީންނެވެ. 2022 ވަނަ އަހަރުގެ ފެބްރުއަރީ މަހު ޔޫކްރޭންގެ ހަމަނުޖެހުން ބޮޑުވުމާ ގުޅިގެން އެމެރިކާ އާއި އެމެރިކާގެ އެކުވެރި ގައުމުތަކުން ވަނީ ރަޝިޔާގެ މަރުކަޒީ ބޭންކުގެ ގާތްގަނޑަކަށް 300 ބިލިއަން ޑޮލަރުގެ އެސެޓްތައް ފްރީޒްކޮށްފައެވެ.
އެ ފައިސާގެ ބޮޑު ބައެއް ކަމަށްވާ ގާތްގަނޑަކަށް 197 ބިލިއަން ޔޫރޯ (213 ބިލިއަން ޑޮލަރު) ހުރީ ޔޫރޯކްލިއާގަ އެވެ. ޔޫރޯކްލިއަރ އަކީ، ބްރަސެލްސްގައި ހުންނަ ކްލިއަރިން ހައުސް އެވެ. ލަފާކުރެވޭ ގޮތުގައި ޖުލައި މަހުގެ މެދުތެރޭގައި ރަޝިޔާގެ އެސެޓްތަކުގެ އިންޓަރެސްޓްގެ ގޮތުގައި 3.4 ބިލިއަން ޔޫރޯ (3.7 ބިލިއަން ޑޮލަރު) ޔޫރޯކްލިއަރ އަށް ލިބިފައިވެ އެވެ.
ހުކުރު ދުވަހު ޖީ7 ގައުމުތަކުން ބުނެފައި ވަނީ ޔޫކްރޭނަށް ދޭ ލޯނުތަކަށް ފައިސާދީ އެފައިސާ އަނބުރާ ދައްކަން ބޭނުން ކުރާނީ ފޭރިގެންފައިވާ ރަޝިޔާގެ މި އެސެޓުތަކުން ކަމަށެވެ.
"އަޅުގަނޑުމެންގެ އަމާޒަކީ އަހަރު ނިމޭއިރު ފައިސާ ދޫކުރަން ފެށުން،" ހުކުރު ދުވަހު ވޮޝިންޓަންގައި އެ ގްރޫޕްގެ މާލީ ވެރިން ބައްދަލުކުރުމަށް ފަހު ނެރުނު ޖީ7 ގެ ބަޔާނުގައިވެ އެވެ. އެފައިސާ ޔުކްރެއިންގެ ނިޒާމަށް ދޭނީ ޑިސެމްބަރު މަހުގެ އެއްވަނަ ދުވަހުން ފެށިގެން 2027 ވަނަ އަހަރުގެ ނިޔަލަށެވެ.
އެމެރިކާ ރައީސް ވަނީ ރަޝިޔާ ފައިސާއިން ޔުކްރެއިންއަށް ކުލީ ހަނގުރާމައަށް 20 ބިލިއަން ޑޮލަރުގެ ލޯނެއް ދޭން އިއުލާން ކުރައްވާފައެވެ.
އިނގިރޭސިވިލާތުގެ ޗާންސެލާ އޮފް ދަ އެކްސްޗެކަރ ރޭޗަލް ރީވްސް ވަނީ ރަޝިޔާގެ ފައިސާއިން ޔުކްރެއިންގެ ކުލީ ހަނގުރާމައަށް ހޭދަކުރުމުގެ މެކޭނިޒަމެއްގެ މައްޗަށް ބިނާކޮށް ލަންޑަނުން ކިއެވްއަށް 2.26 ބިލިއަން ޕައުންޑް (2.94 ބިލިއަން ޑޮލަރު) ގެ ލޯނެއް ދޫކުރާނެ ކަމަށް ވިދާޅުވެފައެވެ.
އަދި ޔޫރަޕިއަން ޕާލަމެންޓުން ވަނީ ރަޝިޔާގެ ފްރީޒްކޮށްފައިވާ އެސެޓްތަކުން ލިބޭ އާމްދަނީގެ ދަށުން ޔޫކްރޭނަށް ކުލީ ހަނގުރާމައަށް 35 ބިލިއަން ޔޫރޯ (38 ބިލިއަން ޑޮލަރު) ގެ ލޯނެއް ދިނުމަށްވެސް ފާސްކޮށްފަ އެވެ.
