އީރާނަށް ހަމަލަ ދިނުމަށް ޒަޔަނިސްޓު ސެކިއުރިޓީ ކެބިނެޓުން ނިންމުމުގެ ގަޑިއެއްހައި އިރު ކުރިން އިޒްރޭލުގެ ދިފާއީ ވަޒީރު ވަނީ ނަތަންޔާހޫއަށް ނުރުހުމުގެ ސިޓީއެއް ފޮނުވާފައެވެ. ޔޯވް ގަލަންޓު ބުނަނީ އަޅަމުންދާ ކަސިޔާރު ފިޔަވަޅުތަކުން، އިޒްރޭލު ދެމިއޮތުމަށް ނުރައްކާ ވާކަމަށެވެ. އަދި ކެބިނެޓުން ނިންމާ ނިންމުންތަކުން ހަނގުރާމަ ކުރިއަށް ގެންދިއުމަށް ހުރަސް އެޅޭ ކަމަށެވެ. ގަލަންޓު ބުނެފައި ވަނީ ވާންވީ ގޮތެއް ނޭނގި އަމާޒު ލާރޫހޭ ކަމަށެވެ.
ގަލަންޓު ސިޓީ ވަނީ މީޑިއާއަށްވެސް ފާއްދާލާފައެވެ. އެކަމާ ގުޅިގެން ނަތަންޔާހޫ ބުނެފައި ވަނީ އީރާނަށް ހަމަލަ ދިނުމުގެ ހޫނުގަނޑު އޮބުމުން ގަލަންޓު މަގާމުން ވަކި ކުރާނެ ކަމަށެވެ. މިއީ ނަތަންޔާހޫ، ގަލަންޓު މަގާމުން ވަކި ކުރުމަށް އިންޒާރު ދިން ފުރަތަމަ ފަހަރެއްވެސް ނޫނެވެ. މީގެ ކުރިން ކުރި މަސައްކަތްވެސް ވަނީ ނާކިޔާބު ވެފައެވެ.
ބުނެވޭ ގޮތުގައި ނަތަންޔާހޫގެ ސަޕޯޓު ގެއްލިއްޖެނަމަ، ލިކޫދު ޕާޓީގެ ކޯލިޝަނުން ވެރިކަމަށް އަންނާނެ މީހަކީ ގަލަންޓެވެ. ނަމވެސް ހައްދުފަހަނައަޅާފައިޥާ ދީނީ ޓެރަރިސްޓް ޕާޓީތަކުން އޭނާއަށް ސަޕޯޓު ކުރާނެ ކަމަކަށް ނުބެލެވެއެވެ.
ގަލަންޓުގެ ސިޓިއާ ބެހޭ ގޮތުން ރިޕޯޓުކޮށްފައި ވަނީ ޒަޔަނިސްޓުންގެ ޗެނަލް 13 އިންނެވެ.
އޭނާ ބުނެފައި ވަނީ އީރާނާއެކު ހަނގުރާމަ ކުރުމަށާއި އެތައް މައިދާނެއްގައި ހަނގުރާމަ ކުރިއަށް ގެންދިއުމަށް ހަނގުރާމައިގެ އަމާޒަކީ ކޮބައިކަން ސާފުވާން ޖެހޭ ކަމަށެވެ.
ޒަޔަނިސްޓުންގެ ހަނގުރާމައާ މެދު ސިފައިންގެ ތެރޭގައިވެސް ޚިޔާލު ތަފާތު ވުން އުޅެއެވެ. އެންމެ އިސް ފަސް ކޮމާންޑަރުން ވެސް ސިފައިންގެ ތެރޭގައި ޚިދުމަތް ނުކުރާނެކަމަށް ބުނެ ދިޔަކަމަށް ޗެނަލް 13އިން ރިޕޯޓުކޮށްފައި ވެއެވެ.
ގަލަންޓުގެ ސިޓީގައި ވަނީ އެކި މައިދާނުގައި އަޅަންވީ ފިޔަވަޅުތައްވެސް ވަކިވަކިން ކިޔައިދީފައެވެ. އަދި ބައިނަލްއަޤްވާމީ މައިދާނުގައި ކަން ކުރަންވީ ގޮތްވެސް އޭނާ ލިސްޓުކޮށްފައި ވެއެވެ.
އޭނާގެ ސިޓީ ވަނީ ސެކިއުރިޓީ ކެބިނެޓުގެ އެންމެނަށް ވަކިވަކިން ހަވާލުކޮށްފައެވެ. ނަމަވެސް ފުލުހުންގެ ޚަބީސް ވަޒީރު ތާކިހާ އެޅި ބިން ގްވީރަށް އެ ސިޓީގެ ކޮޕީއެއް ގެލެންޓު ދީފައެއްނުވެއެވެ.
