ޗައިނާއިން ދެކޮޅު ހަދަމުން ދަނިކޮށް، ޖަޕާނުނުން ވަނީ އެޤައުމުގެ އިރުދެކުނު ޕެސިފިކް ޖަޒީރާތަކުގެ އިރުމަތިން އޮންނަ ސަރަހައްދަށް ޖަޕާނުގެ ސިޔާދަތު އޮތްކަމަށް ބުނެ، ކޮންޓިނެންޓަލް ޝެލްފު ބޮޑުކޮށް، އެއީ ޖަޕާނުގެ ސަރަހައްދެއް ކަމަށް އިއުލާން ކޮށްފައެވެ.
ޖަޕާނު ކެބިނެޓުން މިކަމާ ގުޅިގެން ނެރެފައިވާ އާންމު ސިޓީއާއެކު އޮގަސާވާރާ ޕްލެޓޫގެ ކަނޑުގެ ސަރަހައްދުގެ ބޮޑު ބައެއް ކޮންޓިނެންޓަލް ޝެލްފްގެ ބައެއްގެ ގޮތުގައި ކަނޑައެޅިގެން ހިނގައްޖެއެވެ.
މިއީ މަދުން ނޫނީ ނުފެންނަ ނާދިރު މައުދަންތައް ހިމެނޭ އަދި ކަނޑުގެ ގުދުރަތީ ވަސީލަތްތައް މުއްސަނދި ސަރަހައްދެކެވެ. މިތަނުން މައުދަން ނެގުމަށް ޖަޕާނުން ދިރާސާތައް ފެށުމަށް ތައްޔާރުވާކަމަށް، ޓޯކިޔޯގެ ކިޔޯޑޯ ނިއުސް އެޖެންސީން ރިޕޯޓުކޮށްފައި ވެއެވެ.
މިދިޔަ މަހު ޖަޕާނުގެ ކެބިނެޓުން ވަނީ އޮގަސާވާރާ ޖަޒީރާތަކުގެ ދުރު އިރުމަތީ ފަރާތުގައި އޮންނަ ސަރަހައްދު 120،000 އަކަމީޓަރު (ގާތްގަނޑަކަށް 46،330 އަކަމީޓަރު) އަށް ފުޅާކުރާނެކަން އަންގާފައެވެ.
މި ފިޔަވަޅާ ގުޅިގެން ޓޯކިޔޯއާއި ބެއިޖިންގެ ދެމެދު ބަހުގެ ޒުވާބެއް ހިނގިއެވެ.
ޗައިނާގެ ފޮރިން މިނިސްޓްރީގެ ތަރުޖަމާނު މައޯ ނިންގް ވަނީ ޖަޕާނުގެ ނިންމުމަކީ "އދގެ ކަނޑުގެ ޤާނޫނާއި ކަނޑާބެހޭ އާންމު އުސޫލުތަކާ ބެހޭ މުއާހަދާގެ ޝަރުތުތަކާ ޚިލާފު ނިންމުމެއް" ކަމަށް ވިދާޅުވެފަ އެވެ. ޗައިނާއިން މިހެން ބުނެފައި ވާއިރު ޗައިނާއަކީ ދެކުނު ޗައިނާ ކަނޑުގައި ފިލިޕީންސްގެ ޖަޒީރާތަކަށް މެނީލާގެ ހައްގެއް އޮންނަކަމަށް ކަނޑުތަކާ ބެހޭ ބައިނަލްއަގްވާމީ ގާނޫނަށް ހަވާލާދީ ކަނޑުތަކާ ބެހޭ ބައިނަލްއަގްވާމީ ޓްރައިބިއުނަލުން ނިންމި ނިންމުން ބަލައި ނުގަންނާނެކަމަށް ބުނި ގައުމެވެ.
މިދިޔަ މަހު ޖަޕާނުގެ މިނިސްޓަރު ފޯ އޯޝަން ޕޮލިސީ، ޔޮޝިފޫމީ މަޓްސުމޫރާ ވިދާޅުވީ ޖަޕާނުގެ އިސްތިގުލާލީ ހައްގުތައް ބޭނުންކޮށްގެން ކޮންޓިނެންޓަލް ޝެލްފް ފުޅާކޮށް ގުދުރަތީ ވަސީލަތްތައް ތަރައްގީ ކުރެވޭނެ ގޮތްތައް ހޯދާނެ ކަމަށެވެ.
ޓޯކިޔޯއިން ބުނަނީ ފުޅާކުރި ސަރަހައްދުގައި ކޯބަލްޓް ގިނަ މުރަކައާއި ގާ ހުރިކަން ކަށަވަރުވާ ކަމަށެވެ. އެއީ، އިލެކްޓްރިކް ވެހިކަލްތަކުގެ ބެޓެރީތަކުގައި ބޭނުންކުރާ މަދުން ނޫނީ ނުފެންނަ ނާދިރު މާއްދާއެކެވެ.
