ސަޢޫދީ ޢަރަބިއްޔާއިން ވެރިރަށުގައި ގެފުޅާ އެއް ބައްޓަމަކަށް ބިލްޑިންގެއް ބިނާ ކުރުމަށް މަސައްކަތް ފަށައިފިއެވެ. ހަތަރެސްކަން ހަމައަށް ޑިޒައިން ކުރާ މިބިލްޑިންގަށް ދީފައިވާ ނަމަކީ، މުކައްޢަބް އެވެ.
ނިމޭއިރު ރަންކުލައިން ހުންނާނެ މި ހަތަރެސްކަން ހަމަ ކިއުބު ވެގެން ދާނީ ދުނިޔޭގެ އެންމެ ބޮޑު އިމާރާތަށެވެ.
އަގުގެ ގޮތުން 50 ބިލިއަން ޑޮލަރު ހޭދަކޮށްގެން ކުރިއަށް ގެންދާ މި މަޝްރޫއުގެ ބިންގާ ވަނީ އެޅިފައެވެ. އަދި ބިންގަލުގެ ގާތްގަނޑަކަށް 86 ޕަސެންޓް ވަނީ ނިމިފައެވެ.
އުސްމިނުގައި 1313 ފޫޓު، ދިގުމިނުގައި 1313 ފޫޓު، ފުޅާމިނުގައި 1313 ފޫޓު ހުންނަ ހަތަރެސްކަން ހަމަ މުކައްޢަބް ގެ މަސައްކަތް ކުރިއަށް ގެންދަނީ މުރައްބަޢާ ޑިވެލޮޕްމަންޓް ކޮމްޕެނީ (އެމްޑީސީ) އިން ނެވެ.
ރާއްޖޭގެ އިމާރާތްތަކުގެ ނިސްބަތުން ބަލާނަމަ، މިއީ 160 ފަންގިފިލާގެ އިމާރާތެކެވެ.
މިހާރުވެސް މުކައްޢަބްގެ މަސައްކަތުގައި ދުވާލަކު ގާތްގަނޑަކަށް 900 ވަރަކަށް ލޭބަރުން ސައިޓްގައި ހަރަކާތްތެރިވެއެވެ. އަދި 250 އެކްސްކަވޭޓަރު ހިންގާފައި ހުރެއެވެ.
މުކައްޢަބް ފަރުމާ ކުރީ، އިންޖިނިއަރިން ކުންފުނި އެޓްކިންސްރިއަލިސް އިންނެވެ. މިއީ ސައުދީ ވެރިރަށުގެ ހުޅަނގު އުތުރުގައި އޮންނަ ނިއު މުރައްބަޢާ ޑިވެލޮޕްމަންޓް މަރުކަޒުގެ ބައެކެވެ.
