ރާއްޖޭގައި ވޭޕް އެތެރެކުރުން މަނާކުރުމަށް ރައްޔިތުންގެ މަޖިލީހަށް ހުށަހެޅި ބިލު ބަލައިގަނެ، ދިރާސާކުރުމަށް އިޖުތިމާއީ ކޮމިޓީއަށް ފޮނުވައިފިއެވެ.
މި ބިލު ދިވެހި ސަރުކާރުގެ ފަރާތުން ހުށަހެޅީ ހެންވޭރު އުތުރު ދާއިރާގެ މެމްބަރު އަހުމަދު އައިފާނެވެ.
މަޖިލީހުގައި ބިލަށް ބަހުސްކުރުމަށްފަހު، ވޯޓުގައި ބައިވެރިވި 77 މެމްބަރުންގެ ތެރެއިން 76 މެމްބަރުންގެ ވޯޓުން ބިލު ބަލައިގަނެވުނެވެ. ވަކި ގޮތަކަށް ނުފެންނަ ކަމަށް ހުޅުމާލޭ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ވޯޓު ދެއްވާފައިވެއެވެ.
ކޮމިޓީން ބިލު ދިރާސާކުރުމަށްފަހު އަނބުރާ މަޖިލީހުގެ ތަޅުމަށް ފޮނުވުމަށް އެއް ދުވަސް ދިނުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ.
މި ޤާނޫނުގެ ދަށުން، ވޭޕް އަދި ވޭޕް އެތެރެކުރުމުން 50,000 ރުފިޔާއިން ޖޫރިމަނާކުރެވޭނެއެވެ. އަދި ވޭޕް ކުރުމަށް ބޭނުންވާ ކޮންމެ އާލާތަކަށް 10,000 ރުފިޔާއިން ޖޫރިމަނާކުރެވޭނެއެވެ. ވޭޕްގެ އާލާތެއް ވިއްކައިފިނަމަ 20,000 ރުފިޔާއިން ޖޫރިމަނާކޮށް، ވިއްކާ ކޮންމެ އާލާތަކަށް 10,000 ރުފިޔާއިން ޖޫރިމަނާކުރެވޭނެއެވެ. އަދި ވޭޕް ބޭނުންކުރާނަމަ 5,000 ރުފިޔާއިން ޖޫރިމަނާކުރެވޭނެއެވެ.
ދިވެހިރާއްޖޭގައި ވޭޕް މަނާކުރުމާއި، ވިއްކުން މަނާ ކުރުމަށް ހަމަޖައްސާފައިވަނީ ނޮވެމްބަރު މަހުގެ 15 ވަނަ ދުވަހުން ފެށިގެންނެވެ. އެ ދުވަހުން ފެށިގެން ރާއްޖެ އެތެރެކުރުން މަނާކުރަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފައިއެވެ. އަދި އެފަދަ ތަކެތި މިއަހަރުގެ ޑިސެމްބަރު 15 ވަނަ ދުވަހުން ފެށިގެން އެފަދަ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުން މަނާކުރުމަށްވެސް ރައީސް ވަނީ އަންގަވާފައެވެ.
ރައީސްގެ މި ނިންމެވުމާއެކު ގިނަ ފަރާތްތަކުން ވަނީ ރައީސްއަށް ތަޢުރީފްކުރައްވާފައެވެ. އެގޮތުން ދުނިޔޭގެ ސިއްޙަތު ޖަމްޢިއްޔާއިންވެސް ވަނީ ރައީސްގެ ނިންމެވުމަށް ތަޢުރީފްކުރައްވާ މަރުޙަބާ ދަންނަވާފައެވެ.
