ފްރާންސްގެ "ފްރާންސް ފުޓްބޯލް" މެގަޒިންއިން ހޮވި އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް، ސްޕެއިން ގައުމީ ޓީމާއި މެންޗެސްޓަރ ސިޓީގެ ހުނަރުވެރި މިޑްފީލްޑަރު ރޮޑްރީއަށް ލިބިއްޖެއެވެ.
ރޮޑްރީ ވަނީ މިދިޔަ ސީޒަނުގައި 5 ތަށި އުފުލާލާފައެވެ. މީގެ ތެރެއިން އެއްތައްޓަކީ ސްޕެއިން ގައުމީ ޓީމާއެކު ހޯދި ޔޫރޯ ފުޓްބޯޅަ މުބާރާތެވެ. މެންޗެސްޓަރ ސިޓީއިން އިނގިރޭސި ޕްރިމިއަރ ލީގުގެ ޗެމްޕިއަންކަން ހޯދައި ދިނުމަށްވެސް ރޮޑްރީ ދެއްކި ކުޅުން ވަރަށް ބޮޑަށް ފާހަގަ ކޮށްލެވެއެވެ. އަނެއްކޮޅުން މީގެ ތެރެއިން 4 މުބާރާތުގެ މޮޅު ކުޅުންތެރިޔަކީވެސް ރޮޑްރީއެވެ.
1996 ވަނަ އަހަރު އުފަންވި ރޮޑްރީ ފާހަގަ ކޮށްލެވެނީ ސޯޝިއަލް މީޑިޔާގައި އެއްވެސް އެކައުންޓެއް ނުގެންގުޅޭ ކުޅުންތެރިއެއް ގޮތުގައެވެ.
ބެލޮންޑިއޯ ހަފްލާ އޮތީ ރޭ ފްރާންސްގެ ޕެރިހުގައެވެ. ރެޔާއި ހިސާބަށް ވަރަށް ބޮޑަށް ބެލެވިފައި އޮތީ މޮޅު ކުޅުންތެރިޔާގެ އެވޯޑް ލިބޭނީ ބްރެޒިލް އާއި ރެއާލް މެޑްރިޑުގެ ފޯވާޑް ވިނީޝިއަސް ޖޫނިއަރއަށް ކަމަށެވެ. އެކަމަކު އެވޯޑް ހަފްލާއަށް ރެއާލްގެ ކުޅުންތެރިންނާއި ކޯޗް ކާލޯ އަންޗެލޮއްޓީ އަދި އެކްލަބުގެ ރައީސް ފްލޮރެންޓީނޯ ޕެރޭޒް ނުދާން ނިންމުމުން ވިނީޝިއަސްއަށް އެވޯޑް ނުލިބޭނެކަން ގާތްގަނޑަކަށް ޔަގީންވިއެވެ.
ރެއާލްއިން ވަނީ ވިނީޝިއަސްއަށް މޮޅު ކުޅުންތެރިޔާގެ މަގާމު ނުލިބުމުން ވަރަށް ބޮޑަށް އެކަމަށް ފާޑުކިޔާފައެވެ.
ބެލޮންޑިއޯ އެވޯޑް ދިނުމަށް ބަލަނީ މައިގަނޑު 3 ކަމަކަށެވެ، އެއީ ކުޅުންތެރިޔާ ދަނޑުމަތީގައި ދައްކާ ކުޅުމަށާއި، ކުޅުންތެރިޔާގެ ސަބަބުން ޓީމަށް ލިބޭ ކާމިޔާބީއަށާއި އަދި ކުޅުންތެރިޔާގެ އަހްލާގަށެވެ.
