ޕެސިކިފް ސަރަހައްދުގައި ހަތިޔާރުގެ ވާދަވެރިކަމަށް ދޮރު ހުޅުވާލަނީ ކަމަށް ބުނެ، އޮސްޓްރޭލިއާ އިން 4.7 ބިލިއަން ޑޮލަރަށް އެމެރިކާއިން ގަންނަ، މިސައިލްގެ ނިޒާމަށް ޗައިނާ ނުރުހުން ފާޅުކޮށްފިއެވެ.
އޮސްޓްރޭލިއާއިން ވަނީ، އެމެރިކާގެ އެސްއެމް-2 އައިއައިސީ އަދި އެސްއެމް-6 މިސައިލް ސިސްޓަމްތައް ގަތުމަށް ނިންމާފައެވެ. މި ޑީލަކީ 2024 ވަނަ އަހަރުގެ އޭޕްރީލް މަހު އޮސްޓްރޭލިއާއިން ތައާރަފް ކުރި ނޭޝަނަލް ޑިފެންސް ސްޓްރެޓެޖީގެ ދަށުން ކުރިއަށް ގެންދާ އެއްބަސްވުމެކެވެ. އަދި މިއީ ޕެސިފިކް ސަރަހައްދުގައި، ޗައިނާގެ ނުފޫޒު ފުޅާވަމުންދާ ގޮތާ ކުރިމަތިލުމަށް އޮސްޓްރޭލިއާއިން ކުރިއަށް ގެންދާ މަސައްކަތެއް ކަމަށް ބުނެއެވެ.
މި މިސައިލް ހޯދުމަކީ ޕެސިފިކް ކަނޑުގެ ހުރިހާ ހިސާބެއްގައި އެމެރިކާގެ އަސްކަރީ ބާރާއި ނުފޫޒު ފުޅާކުރުމުގެ ބޮޑު ޕްލޭންތަކާ ގުޅޭ ކަމެކެވެ. ގުއާމް އާއި ޕަލާއު އާއި 1000 ކިލޯމީޓަރު ދުރުގައި އޮންނަ ކުޑަކުޑަ ޖަޒީރާއެއް ކަމަށްވާ ޔަޕްގެ ފެސިލިޓީތައް އަޕްގްރޭޑް ކުރުމަށް އެމެރިކާއިން ވަނީ 400 މިލިއަން ޑޮލަރު ކަނޑައަޅާފައެވެ. އެ ކަމަށް މިއަންނަ އަހަރުގެ ބަޖެޓްގައި އެމެރިކާއިން ވަނީ 95 މިލިއަން ހިމަނާފައެވެ.
ބެއިޖިން އިން ދަނީ އެމެރިކާއިން ކުރިއަރާފައިވާ މިސައިލް އޮސްޓްރޭލިއާއަށް ވިއްކަނީ ކެންބަރާއަށް އޮޅުވާލުމެއްގެ ތެރޭގައި ކަމަށް ބުނަމުންނެވެ. އަދި މިކަމަކީ ޕެސިފިކްގައި ބާރުގެ ހަމަހަމަކަން ގެއްލޭ ކަމެއްކަމަށް ތުހުމަތުކޮށް، ބެއިޖިންގ އިން ވަނީ ހޫނުކޮށް ޑިޕްލޮމެޓިކް ރައްދެއް ދީފައެވެ.
އޮސްޓްރޭލިއާގެ އަސްކަރީ ފެންވަރު މަތިކުރުމަށް މަސައްކަތް ކުރާ މި ދަނޑިވަޅަކީ، ޗައިނާގެ އިގްތިސާދު ހީނަރުވުމާއި ޕްރޮޕަޓީ ކާރިސާއަކާއި ޒުވާނުންގެ ވަޒީފާ ނެތް މިންވަރު މަތިވުން ފަދަ ދާޚިލީ އިގްތިސާދީ ގޮންޖެހުންތައް ކުރިމަތިވެފައިވާ ދަނޑިވަޅެކެވެ. މި ޕްރެޝަރުތަކާ އެކުވެސް، ފަހުންވިއަސް ޗައިނާއިން މިކަމަށް ރައްދުދޭނެ ކަމަށް ތަޖުރިބާކާރުން ލަފާކުރެ އެވެ.
އޮސްޓްރޭލިއާ އާއި ޗައިނާއާ ދެމެދު އުފެދިފައިވާ ކޯޅުންތަކަކީ، އައު ކަމެއް ނޫނެވެ. ކޮވިޑް-19ގެ އަސްލު ތަހުގީގެއް ހިންގުމަށް އޮސްޓްރޭލިއާ އިން ގޮވާލި ފަހުން ގުޅުންތައް ގޯސްވެފައި ވެއެވެ. އޭގެ ސަބަބުން އޮސްޓްރޭލިއާގެ ވައިންއާއި، ކޯލާ ދެއްޔާއި، އަދި ބާރްލީ އެތެރެ ކުރުމަށް ޗައިނާއިން ވަނީ ހުރަސް އަޅާފަ އެވެ.
އޮސްޓްރޭލިއާއަށް ޗައިނާއިން ދޭނެ ރައްދަކަށް އޭޝިއާ ޕެސިފިކް ސަރަހައްދުގެ ގައުމުތަކުން ދާނީ ގާތުން ބަލަމުންނެވެ. ޓައިވާން، ފިލިޕީންސް، ޖަޕާން އަދި ދެކުނު ކޮރެއާއާއި އިންޑިއާއިން މި ގޮންޖެހުންތަކާ ކުރިމަތި ލުމަށް ދިފާއު ވަރުގަދަ ކުރުމަކީ އެކަށީގެންވާ ކަމެކެވެ. މިއީ މުޅި އޭޝިއާ ޕެސިފިކް ސަރަހައްދުގައި އަސްކަރީ ޒަމާނީ ވަސީލަތް ހޯދުމުގެ ވާދަވެރިކަމެއް އުފެދޭނެ ކަމެކެވެ.
ޗައިނާއާއެކު މަސްރަހު ހޫނުވަމުންދާއިރު، ސަރަހައްދީ މައްސަލަތަކާއި ތާރީޚީ ޝަކުވާތަކުން ދެކުނު ޗައިނާ ކަނޑުގެ ސަރަހައްދާއި އިރުމަތީ ޗައިނާގެ ކަނޑުގެ ސަރަހައްދު ދަނީ ކެކެމުންނެވެ.
