ބްރެޒިލްގެ ވިނީޝިއަސް ޖޫނިއާއަށް ބަލޮންޑޯ ނުލިބުނީ އޭނާ "ރޭސިޒަމް" އާ ދެކޮޅަށް މަސައްކަތް ކުރާތީ ކަމަށް އޭނާގެ މެނޭޖްމަންޓް ޓީމުން ބުނެފިއެވެ.
ރޭގައި ބޭއްވި ބަލޮންޑޯ ހަފްލާގައި މެންޗެސްޓާ ސިޓީގެ ރޮޑްރީ ބަލޮންޑޯ ހާސިލުކުރިއިރު, އެއީ އިންސާފުވެރި ނިންމުމެއް ނޫން ކަމަށް ބުނެ, ވިނީޝިއަސްގެ އިތުރުން ރެއާލް މެޑްރިޑުގެ އެއް ވެސް ކުޅުންތެރިޔަކު އެ ހަފްލާއަށް ގޮސްފައެއް ނުވެއެވެ.
ބަލޮންޑޯ ރޭންކިންގްސްއިން ދެވަނަ ލިބުމުން އެކަމާ މެދު ހިތްހަމަނުޖެހުން ފާޅުކުރަމުން ވިނީޝިއަސް ވަނީ ސޯޝަލް މީޑިއާގައި މެސެޖެއް ޕޯސްޓު ކޮށްފައެވެ.
"އަހަރެން އެ ކަންތައް އިތުރު ދިހަ ފަހަރަށް ވެސް ކުރާނަން ކުރަން ޖެހިއްޖެނަމަ. އެ މީހުންނަކަށް އެ ކަމަކަށް ތައްޔާރެއް ނުވެވޭނެ" ބަލޮންޑޯ ރޭންކިންގްސްއާ މެދު ހިތްހަމަނުޖެހުން ފާޅުކުރަމުން ވިނީޝިއަސް ބުންޏެވެ.
ވިނީޝިއަސްގެ މެސެޖުގައި އެ ބުނާ އަމަލަކީ, ނަސްލީ ތަފާތު ކުރުމާ ބެހޭ ގޮތުން އަޑު އުފުލުން ކަމަށް އޭނާގެ މެނޭޖްމަންޓް ޓީމުން ވަނީ ޔަގީން ކޮށްދީފައެވެ.
އޭނާގެ ޓީމުން ބުނި ގޮތުގައި ވިނީޝިއަސްއަށް ބަލޮންޑޯ ނުލިބުނު ސަބަބަކީ ކޮރަޕްޓް ސިސްޓަމެއް ބަދަލުކުރަން މަސައްކަަތް ކުރާ ކުޅުންތެރިޔަކަށް ފުޓުބޯޅަ ދުނިޔެ ތައްޔާތު ނުވާތީ ކަމަށެވެ.
ވިނީޝިއަސްއަކީ ނަސްލީ ތަފާތު ކުރުމުގެ ޝިކާރައަަކަށް އެތައް ފަހަރަކު ވެފައިވާ, އަދި އެ ތަފާތު ކުރުންތަކާ ދެކޮޅަށް އަޑު އުފުލަމުން އަންނަ ކުޅުންތެރިޔެކެވެ. ވިނީޝިއަސްގެ އިތުރުން އޭނާގެ ބައެއް ސަޕޯޓަރުން ވެސް ދެކެނީ އޭނާއަށް ބަލޮންޑޯ ދޭން "ފްރާންސް ފުޓްބޯލް" އިން ދެކޮޅު ހެދީ އޭނާ ނަސްލީ ތަފާތު ކުރުމާ ދެކޮޅަށް އަޑުއުފުލާތީއެވެ.
