ސްޕެއިންގެ ވެރިރަށް މެޑްރިޑްގައި ސައުދީގެ ޑިފެންސް މިނިސްޓްރީން ވަނީ ސްޕެއިންގެ ޑިފެންސް މިނިސްޓްރީއާ އެކު 3 މަނަވަރު ބަނުމަށް އެގްރީމަންޓެއްގައި މިއަދު ސޮއިކޮށްފަ އެވެ. ސްޕެއިން އިން ބަނދެ ދޭނީ ކޯވެޓް އަވަންޓީ 2200 މަރުކާގެ 3 މަނަވަރެވެ. މީގެ ކުރިން އެ ބާވަތުގެ 5 މަނަވަރު ބަނދެފައި ސައޫދީ ނޭވީއާ ޙަވާލުކޮށްފައި ވެއެވެ.
އޭގެ އިތުރުން ސައޫދީ ސިފައިންގެ ތަމްރީނާއި، ތަޖުރިބާ ބަދަލުކުރުމާއި، ޓެކްނިކަލް އަދި ލޮޖިސްޓިކަލް ސަޕޯޓްގެ ދިނުމަށްވެސް ސްޕެއިން އިން އެހީވާނެއެވެ.
ސައޫދީ 2030 މާރެސްގެ ދަށުން އެގައުމުގެ ދިފާއީ ދާއިރާގެ ބާރުގަދަ ކުރުމަށްވެސް މަސައްކަތް ފަށާފައި ވެއެވެ.
ސައޫދީ ސަރުކާރުން ވަނީ އިޓަލީގެ ހެލިކޮޕްޓަރު އުފައްދާ ލެއޮނާޑޯ ކުންފުންޏާއެކު، ސައޫދީ އަރަބިއްޔާގައި ހެލިކޮޕްޓަރު އުފެއްދުމުގެ އެއްބަސްވުމެއްވެސް އެކުލަވާލާފައެވެ. 2030ގެ ދިފާއީ މާރެސްގެ ދަށުން ސިފައިންނަށާއި ދިފާއަށް ކުރާ ހޭދައިގެނ 50 ޕަސެންޓް ހޭދަވާން ޖެހޭނީ ސައޫދީ އަރަބިއްޔާގެ އެތެރެއަށެވެ. މާނައަކީ ހަތިޔާރު އުފައްދާ ކުންފުނިތަކުން ސައޫދީގައި އެމީހުންގެ އުފެއްދުންތައް ގާއިމް ކުރަން ޖެހޭނެއެވެ.
ސަޢޫދީ އަރަބިއްޔާއިން މިއަހަރަށް، 71.7 ބިލިއަން ޑޮލަރުގެ ދިފާއީ ބަޖެޓެއް އެކުލަވާލާފައި ވެއެވެ.
