އިންޑޮނޭޝިއާގެ ކަނޑުގެ ސަރަހައްދަށް ވަދެގެން އުޅުނު، ޗައިނާގެ ކޯސްޓްގާޑް އުޅަނދު ފައްސާލާފައިވާ ކަމަށް އިންޑޮނޭޝިއާގެ މެރިޓައިމް ސެކިއުރިޓީ އެޖެންސީން ބުނެ އެވެ.
މިއީ އިންޑޮނޭޝިއާގެ ސްޓްރެޓެޖިކް ވޯޓާވޭގައި ޗައިނާގެ ހަރަކާތްތަކާ ދެކޮޅަށް ދެކުނު އިރުމަތީ އޭޝިއާގެ ގައުމަކުން އެޅި އެންމެ ފަހުގެ ފިޔަވަޅެވެ.
ދެކުނު ޗައިނާ ކަނޑުގެ ދެކުނު އައްސޭރީގައި އޮންނަ އުތުރު ނަޓޫނާ ކަނޑުގެ އިންޑޮނޭޝިއާ އިން ދައުވާކުރާ ސަރަހައްދުތަކަށް ޗައިނާގެ އުޅަނދުތައް ދޭތެރެ ދޭތެރެއިން ވަދެ ހަދައެވެ. ޖަކާޓާއިން އެކަމާ ދެކޮޅަށް އިހުތިޖާޖުކޮށް ހަދާކަމަށްވެސް ރިޕޯޓްތައް ބުނެ އެވެ.
"ޗައިނާ ކޯސްޓްގާޑް އުޅަނދު 5402 އިންޑޮނޭޝިއާގެ ސަރަހައްދަށް އަލުން ވަދެފައިވަނީ ހުކުރު ދުވަހު،" އިންޑޮނޭޝިއާގެ މެރިޓައިމް ސެކިއުރިޓީ އެޖެންސީން ނެރުނު ބަޔާނެއްގައި ބުނެފައިވެ އެވެ. އަދި އެ ބޯޓު ހޯމަ ދުވަހާއި ބުދަ ދުވަހުވެސް އެސަރަހައްދަށް ވަންކަމަށާއި އެތަނުން އިންޑޮނޭޝިއާގެ ޕެޓްރޯލް ބޯޓުތަކުން ޗައިނާ ބޯޓު ފައްސާލިކަމަށް ބުނެއެވެ.
ޗައިނާ ކޯސްޓްގާޑުގެ އުޅަނދުގެ ސަބަބުން، އިންޑޮނޭޝިއާގެ ތެޔޮ ކުންފުނި ޕެރްޓަމިނާއިން އެ ހިސާބުގައި ކުރަމުންދާ ސާވޭއަކަށް ބުރޫއަރާފައިވާ ކަމަވެސް ބުނެފައި ވެއެވެ. އަދި އިންޑޮނޭޝިއާގެ ބޯޓަކުން ޗައިނާ ކޯސްޓްގާޑް އުޅަނދާ ގުޅުމުން ޗައިނާގެ ކޯސްޓްގާޑުން ބުނީ އެ ސަރަހައްދަކީ ބެއިޖިންގެ އިހްތިސާސްގެ ބައެއް ކަމަށެވެ.
އިންޑޮނޭޝިޔާއިން ބުނީ އެ ސަރަހައްދަކީ ބައިނަލްއަގްވާމީ ގާނޫނުތަކުގެ ދަށުން އިންޑޮނޭޝިއާގެ ސަރަހައްދެއްގެ ގޮތުގައި ބަލައިގަނެފައިވާ ސަރަހައްދެއް ކަމަށެވެ.
