ޗައިނާ ސިފައިން ރޭގަނޑުގެ އަސްކަރީ ތަމްރީނުތަކަށް ބާރުއެޅުމަކީ ޓައިވާންއާ ގުޅިގެން ކުރިމަތިވެދާނެ ހަނގުރާމައެއްގެ ކުއްލި ހާލަތަކަށް ތައްޔާރުވުމުގެ އިޝާރާތެއް ކަމަށް އަސްކަރީ ތަޖުރިބާކާރުން ބުނެ އެވެ.
ސައުތު ޗައިނާ މޯނިންގ ޕޯސްޓުން ބުނީ، ބެއިޖިންގެ އެންމެ އިސް އަސްކަރީ އޮފިޝަލް ޒާންގް ޔޫކްސިއާ ވަނީ މި ހަފްތާގެ ކުރީކޮޅު ހެބޭއިގައި ބޭއްވި ރޭގަނޑުގެ އެންމެ ފަހުގެ އަސްކަރީ ތަމްރީނުތައް ބައްލަވާފައި ކަމަށެވެ.
ޒާންގް އަކީ ރައީސް ޝީ ޖިންޕިން އިސްކޮށް ހުންނަވާ ސެންޓްރަލް މިލިޓަރީ ކޮމިޝަންގެ ފުރަތަމަ ނައިބު ރައީސެވެ. އަދި ޗައިނާގެ ސިޔާސީ އެންމެ މަތީ ނިންމުންތައް ނިންމާ ގްރޫޕް ކަމަށްވާ ޕޮލިޓްބިއުރޯގެ މެމްބަރެވެ.
އޭނާ ވަނީ ރޭގަނޑު ބޭއްވި އަސްކަރީ ތަމްރީންގެ ލައިވް ފަޔަރ ޑްރިލްތައް އިންސްޕެކްޓް ކުރައްވާފައެވެ. މިދިޔަ ހުކުރު ދުވަހު ފެށި ތިން ދުވަސް ވަންދެން ކުރިއަށް ގެންދިޔަ "ކޮމްބައިންޑް މިލިޓަރީ އޮޕަރޭޝަނެއް" ޗައިނާ ސިފައިން ކުރިއަށް ގެންގޮސްފައިވާ ކަމަށް ދައުލަތުގެ ނޫސް އެޖެންސީ ޝިންހުއާ އިން ބުނެ އެވެ.
