ޕާކިސްތާންގައި ޓެރަރިސްޓް ހަމަލަތައް އިތުރު ވަމުން ދިއުމާ ގުޅިގެން ޕާކިސްތާނުގެ ޚާއްސަ ކައުންޓަރ ޓެރަރިޒަމް ފޯހެއް ބޭނުންވާ ކަމަށް މީޑިއާއިން ގޮވާލައެވެ. ފަހަކަށް އައިސް ކުރިމަތިވި އަނިޔާވެރިކަމުގެ ސަބަބުން މިކަމަށް މުހިންމު ވެފައިވާކަން އެނގޭ ކަމުގައި މުހައްލިލުންނާ ހަވާލާދީ ޑޯން ނޫހުގައި ބުނެފައި ވެއެވެ.
ޕާކިސްތާންގެ ޚައިބަރު ޕަޚުތޫން ޚުވާގައި އަނިޔާވެރިކަމާއި ހަމަނުޖެހުން އަނެއްކާވެސް އިތުރު ވެގެން މީހުން ނުތަވަސްކަން ފާޅުކުރަން ފަށައިފިއެވެ. ފާއިތުވި ދުވަސްތަކުގައި އެތައް ހަމަލާތަކެއް ދިނުމުން ގިނަ އަދަދެއްގެ ސަލާމަތީ ފަރާތްތަކުގެ ފުރާނަ ވަނީ ގެއްލިފައެވެ.
ހޮނިހިރު ދުވަހު އުތުރު ވަޒީރުސްތާނުގައި ޖާނު ގޮއްވާލައިގެން ހަތަރު ފުލުހަކާއި އެކު އަށް މީހަކު ވަނީ ޝަހީދުވެފަ އެވެ. އޭގެ ކުރީ ރޭގައި ހަނގުރާމަވެރިން ވަނީ ޗެކްޕޮއިންޓަކަށް ވަދެ ފްރޮންޓިއާ ކޮންސްޓަބްލަރީގެ 10 މީހަކު ޝަހީދުކޮށްލާފައެވެ.
މިހަމަލާ ދީފައި ވަނީ ޕާކިސްތާންގައި މަނާ ޖަމާއަތެއްކަމަށް ކަނޑައަޅާފައިވާ ތަޙުރީކޭ ތާލިބާން ޖަމާއަތުގެ މީހުންނެވެ. އެމީހުން ބުނީ، މި ހަމަލައަކީ މީގެ އެއް ދުވަސް ކުރިން ހިންގި އޮޕަރޭޝަނެއްގެ ‘ބަދަލު ހިފުމުގެ’ އަމަލެއް ކަމަށެވެ.
ޓެރަރިސްޓް ހަމަލާތަކުގައި ޝަހީދުވާ ސަލާމަތީ ފަރާތްތަކުގެ އަދަދު އިތުރުވަމުން ދިއުމުން ޕާކިސްތާން ސަރުކާރުވެސް ނުތަވަސް ވެއެވެ.
ދާދި ފަހުން ދިން ހަމަލައެއްގައި ލައްކީ މަރްވާތުގެ މިސްކިތަކަށް ހަމަލާދީ ފުލުހަކުވެސް މަރާލާފައި ވެއެވެ. އެމީހާ މަރުވުމުގެ ކުރިން އެތައް ބައެއްގެ ފުރާނަ ސަލާމަތް ކުރިކަމަށް ވެއެވެ.
ޓެރަރިސްޓް ޖަމާއަތްތަކާއި ރައްޔިތުންނާއި ސަލާމަތީ ބާރުތަކާ ދެމެދު ތިނެސްކަން ކުރިމަތިލުންތަކެއް ހިނގައިގެން ޚައިބަރުގައި ނުތަނަވަސްކަން އުފެދިފައި ވެއެވެ.
