ސައިބަރ އެވެއާނަސް މަސް ފާހަގަކުރުމަށް ކުރިއަށް ގެންދާ ހަރަކާތްތަކުގެ ތެރެއިން މައުލޫމާތުދިނުމުގެ ހަރަކާތެއް ކުޅުދުއްފުށީގައި ކުރިއަށް ގެންގޮސްފިއެވެ.
ފުލުހުން ބުނީ މަހުގެ 27 ވަނަ ދުވަހުން ފެށިގެން ކުރިއަށްގެންދާ މި ހަރަކާތްތަކުގައި ގޭބިސީ ތަކަށް ޒިޔާރަތްކުރުމާއި ފިހާރަތަކާ އަދި އާންމު ރައްޔިތުންގެ އިތުުރުން އިސް ރަށްވެހިންނާއި، އާންމުކޮށް މީހުން އެއްވެ އުޅޭ ސަރަހައްދުތަކަށް ޒިޔާރަތްކޮށް މައުލޫމާތުދީފައިވާ ކަމަށެއެވެ.
އެގޮތުން، ރައްކާތެރި ގޮތުގައި އިންޓަނެޓް ބޭނުންކުރުމާއި އެކައުންޓުތަކުގެ ޕްރައިވެސީ ސެޓިންގ ހެދުމާއި ޒާތީ މައުލޫމާތު ނުފެންނަ ގޮތަށް ހެދުމާއި ސޯޝަލް މީޑިއާގެ މަންސަތައް ބޭނުންކުރާއިރު ރައްކާތެރިކަން އިސްކުރާނެ ގޮތްތަކާ ބެހޭގޮތުން މައުލޫމާތުދީފައިވާ ކަމަށާއި އަަދި ވައިބަރ އާއި ވަޓްސްއަޕް ސެކިއުރިޓީ ސެޓިންގ ހަދާނެ ގޮތްތައް ވެސް ބުނެދީފައިވާ ކަމަށްވެސް ފުލުހުން ބުންޏެވެ.
މީގެ އިތުރުން، ފުލުހުން ބުނީ ގަވާއިދުން ސޮފްޓްވެއަރ އަޕްޑޭޓްކުރުމާއި ޓޫ ފެކްޓަރ އޮތެންޓިކޭޝަން އެކްޓިވްކުރާނެ ގޮތުގެ މައުލޫމާތު ވެސް ހިއްސާކޮށްފައިވާ ކަމަށާއި އަދި ސްއޯޓީޕީ އަށް ރައްކާތެރިވުމަށާއި ގޮތް ނޭގޭ ލިންކުތަކަށް ނުވަނުމަށް ހޭލުންތެރިކުރުވައި މައުލޫމާތުދީފައިވާ ކަމަށެވެ.
ސައިބަރ އެވެއާނެސް މަސް ފާހަގަކުރުމަށް ރާއްޖޭގެ ހުރިހާ ހިސާބެއްގައި ވެސް މި މަހުގެ ތެރޭގައި ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. އެގޮތުން ސްކޫލްތަކުގެ ދަރިވަރުންނާއި ސަރުކާރު އިދާރާތަކުގެ މުވައްޒަފުންނާއި އާންމު ރައްޔިތުންނަށް ވެސް ހޭލުންތެރިކުރުވުމަށް މައުލޫމާތުދީފައިވެއެވެ.
