ހިއުމަން ރައިޓްސް ވޮޗުން މިއަދު، ބުދަ ދުވަހު ނެރުނު ބަޔާނެއްގައި ބުނެފައި ވަނީ އިޒްރޭލު "ސިފައިން" ތަކުރާރުކޮށް ލުބުނާނުގެ މެޑިކަލް މުވައްޒަފުންނާއި ސިއްހީ ހިދުމަތްދޭ ތަންތަނަށް ހަމަލާދެމުންދާ ކަމަށާއި، "ޕެރެމެޑިކްސް އަށް އިސްރާއީލުން ދިން ހަމަލާތަކަކީ ސާފު ގޮތެއްގައި ހަނގުރާމައިގެ ޖަރީމާތަކެއް" ކަން ފާހަގަ ކުރެވޭ ކަމަށެވެ.
އިންސާނީ ހައްގުތައް ދިފާއުކުރުމަށް މަސައްކަތް ކުރާ ބައިނަލްއަގްވާމީ އަމިއްލަ ޖަމުއިއްޔާއެއް ކަމަށްވާ ހިއުމަން ރައިޓްސް ވޮޗްއިން ޝާއިއުކުރި ރިޕޯޓުގައި ހަނގުރާމައިގެ ޖަރީމާތައް ކަމަށް ބެލެވޭ 3 ހަމަލާއެއް ބަޔާން ކޮށްދީފައި ވެއެވެ.
އޭގެ ތެރޭގައި އިޒްރޭލު ސިފައިން މެޑިކަލް އެހީދޭ ވެހިކަލްތަކުގެ ކްރޫންނާއި އެކަމުގެ ދަތުރުފަތުރުގެ ވަސީލަތްތަކާއި މެޑިކަލް ފެސިލިޓީތަކަށް ބޮން އެޅުން ހިމެނޭ ކަމަށް ބުނެފައި ވެއެވެ.
އޮކްޓޯބަރު މަހުގެ ތިން ވަނަ ދުވަހު ސެންޓްރަލް ބެއިރޫތު ކައިރީގައި ސިވިލް ޑިފެންސް ސެންޓަރެއް ގޮއްވާލުމާއި އޮކްޓޯބަރު މަހުގެ ހަތަރު ވަނަ ދުވަހު ލުބުނާނުގެ ދެކުނުގައި ހުރި އެމްބިއުލާންސްތަކަކާއި ހޮސްޕިޓަލެއްގައި ގޮއްވާލުމާއި އެތާނގައި 14 ޕެރެމެޑިކްސް މަރާލުންވެސް ލިސްޓުކޮށްފައި ވެއެވެ.
ހިއުމަން ރައިޓްސް ވޮޗްއިން ފާހަގަކުރި ގޮތުގައި އޮކްޓޯބަރު މަހުގެ 25 ވަނަ ދުވަހުގެ ނިޔަލަށް ލުބުނާނުގެ ސިއްހީ އަދި ހޮސްޕިޓަލް ދާއިރާގެ 163 ފަރާތެއް އިޒްރޭލުން މަރާލާފައި ވެއެވެ. އަދި 158 އެމްބިއުލާންސް ގޮއްވާލައި 55 ހޮސްޕިޓަލަށް ބޮން އަޅާފައި ވެއެވެ.
އެހެންކަމުން އެ ޖަމިއްޔާއިން ގޮވާލާފައި ވަނީ "ސިއްހީ މުވައްޒަފުންނާއި ފެސިލިޓީތަކަށް އިޒްރޭލުން ދޭ ގަވާއިދާ ޚިލާފް ހަމަލާތައް ވަގުތުން ހުއްޓުވަން" ކަމަށާއި "އިސްރާއީލުގެ އެކުވެރިން އެގައުމަށް ހަތިޔާރު ސަޕްލައި ކޮށްދިނުން މެދުކަނޑާލުމަށެވެ.
