ފޭރު އިންދާ ހެއްދުން

ތައާރަފް

ފޭރުގަހަކީ 15-20 ފޫޓުގެ އުސްމިނަށް ހެދޭ ކަފިގޮފި ގިނަގަހެކެވެ. ފޭރުން ތަފާތު ކާތަކެއްޗާއި، ޖޫސްފަދަ ތަކެތި ތައްޔާރުކުރެވެއެވެ. މީގެ ތެރޭގައި ޖެލީ އާއި ޖޭމްވެސް ހިމެނެއެވެ. އަދި ފޭރަކީ ހަށިގަނޑަށް ބޭނުންވާ ކާނާގެ ބައެއް ބާވަތްތައް ހިމެނޭ މޭވާއެކެވެ. މިގޮތުން ފޭރުގައި ޕްރޮޓީންސް، ފެޓްސް، ކާރބޯހައިޑްރޭޓްސް އަދި ފައިބަރ އަދި ގިނަ ޢަދަދަކަށް ވިޓަމިންސީ ހިމެނެއެވެ. ފޭރުގައި އާދައިގެ ވަރަކަށް ވިޓަމިން އޭ، އަޔަން، ކެލްސިއަމް އަދި ފޮސްފަރަސް ހިމެނެއެވެ.

މުޑުވައްނެގުން

މުޑުވައްނަގާނީ ބަލިނުޖެހޭ ގަހަކުން ރަނގަޅަށް ދޮންވެފައިވާ ބައްޓަން ފުރިހަމަ ފޭރަކުންނެވެ. މުޑުވައް ނަގާއިރު އޮށްމަދު ފޭރަކުން އޮށްނެގުމުން ލިބޭމޭވާގެ އޮށް މަދުވާނެއެވެ. ފޭރުގެ ވައްތަރުތަކުގައި ހިމެނޭ ރަންގު ފޭރަށްވުރެން އާދައިގެ ފޭރުގައި އެކުލެވޭ ވިޓަމިންސް ގިނައެވެ. ރަނގަޅު ފޭރަކުން އޮށްތައް ނެގުމަށްފަހު ރަނގަޅަށް އޮށްތައް ދޮވެލާށެވެ. އޮށްތައް ހިޔަލުގައި ބަހައްޓައިގެން ހިއްކާލުމަށްފަހު އަޅިކޮޅަކާ އެއްކޮށްފައި ވައިނުވަންނާނެހެން ބަންދުކޮށްފައި ބެހެއްޓުމުން ގިނަދުވަހު ހަލާކުނުވެ ހުންނާނެއެވެ.

މުޑުވައްކުރުން

މުޑުވައްކުރާނީ ބޭޑުގައި ނުވަތަ ފޮށިގަނޑެއް ފާޑުގެ އެއްޗެއްގައެވެ. ބެޑް ހަދާއިރު ނުވަތަ ފޮށިގަނޑަކަށް ވެލިއަޅާއިރު ކާދު އެއްކުރުން ރަނގަޅުވާނެއެވެ. އޮށްތައް އިންދުމުގެ އެއްދުވަސްކުރިން ފެންއެއްޗަކަށް އޮށްތައް އެޅުމުން ގަސްފެޅުން އަވަސްވާނެއެވެ. އޮށްއިންދާނީ ހަތަރުބައިކުޅަ އެއްބައި އިންޗި ފުންމިނުގައި ދެބަރި ދޭތެރޭގައި 4 އިންޗި ހުންނަވަރަށެވެ. ދެއޮށް ދޭތެރޭގައި 3 އިންޗި ހުރުމުން ރަނގަޅުވާނެއެވެ. އޮށްއިންދާތާ ގާތްގަނޑަކަށް 2 ނުވަތަ 3 ހަފްތާގެ ތެރޭގައި ގަސްފަޅާނެއެވެ. އޮށް އިންދާފައިވާތަން ގަދަ އަވިން ސަލާމަތްކުރުމަށްޓަކައި ހިޔާކޮށްލުން ރަނގަޅެވެ. ގަސްތައް ފަޅައިގެން 3-4 އިންޗިއަށް ހެދުމުން ގަސްތައް ނަގާ ކޮތަޅު ނުވަތަ ދަޅެއްފަދަ އެއްޗެއްގައި އިންދައިގެން ގަސްތައް ބޮޑުކުރާށެވެ.

ގަސްތައް ރުވުން

ފޭރުއިންދަން ޚިޔާރުކުރެވޭ ބިމަކީ ކަޅުފަސް ގިނައިން އެކުލެވޭ ވެލި ހިމުންނޫން ބޮޑެތި ގަލާއި މޫމަދު ތަނަކަށް ވާންޖެހެއެވެ. އަދި ރަނގަޅު ފެންހުރެފައި ބިންގަނޑު އެއްވަރު ތަނަކަށްވެސް ވާންވާނެއެވެ. މަޑުވަތްކުރި ގަސްތައްރުވާނީ ½ 1 ފޫޓަށް ހެދުމުންނެވެ. ގަސްތައްރުވުމަށްޓަކައި ވަޅު ތައްޔާރު ކުރަންވާނެެއެވެ. މިގޮތަށް 2x2x2 ފޫޓުގެ ވަޅުގަނޑެއް ކޮނުމަށްފަހު ކާދު (ފަތް، ކަރުގޮހު، އަޅި) ފާޑުގެ އެއްޗެތި އަޅާ ފީވަންދެން ބަހައްޓާށެވެ. މިތަކެތި ގާތްގަނޑަކަށް 2 މަސްދުވަސް ނުވަތަ ދޮޅުމަސްދުވަހުގެ ތެރޭގައި ފީވާނެއެވެ. މިއިން ކޮންމެ ދެ ވަޅުގަނޑެއްގެ ދުރުމިނުގައި ގާތްގަނޑަކަށް 15 ފޫޓް ހުރުމުން ރަނގަޅުވާނެއެވެ. ގަސްތައް ރުވުމަށްފަހު ދުވާލަކު ދެއިރު ފެންދޭންޖެހޭނެއެވެ.

ގަސްތައްހޭހަންކުރުން

ގަސްތައް އިންދާ ހެދެންފެށުމުން ފުރަތަމަ 6 މަސްވާންދެން ކޮންމެ މަހަކު އެއްފަހަރު ކާދު އަޅަންވާނެއެވެ. އެއަށްފަހު އަހަރަކު ދެފަހަރު ކާދު އެޅުމުން ރަނގަޅުވާނެއެވެ. ގަސްފޯދި މޭވާ އަޅަންވުމުން ކާދު އެޅުމަށް ޚާއްސަ ސަމާލުކަމެއް ދޭންޖެހެއެވެ. އެއީ މޭވާއަޅާ ދުވަސްވަރު ގަހަށް އިތުރުކާނާ ބޭނުންވާނެތީއެވެ. ފޭރުގަސް އާއްމުގޮތެއްގައި ފޯދޭނީ އިންދާތާ 3-4 އަހަރުންނެވެ. ގަހުގައި މޭވާއަޅާ އޭގެ މޫސުން ދިއުމުން މޭވާއެޅި ކުރިތައް ކޮށާލުން ރަނގަޅެވެ. މިގޮތައް ހެދުމުން ގަސްޅަވެ ދެމޫސުމުގައި މޭވާއަޅައެވެ.

ބަލި އަދި ފަރުވާ

ފޭރުގަހަކީ ޢާއްމުކޮށް ބަލިނުޖެހޭ ގަހެކެވެ. ނަމަވެސް މީލީބަގްސް، ތްރިޕްސް، ސްކޭލް އިންސެކްޓް، ހުދުކޫޑި އަދި އުދުހޭ ހުދުކޫޑި ފަދަ ފަނިފަކުސަ އަޅައެވެ. މިފަދަ ބައެއް ފަނިފަކުސަ އެޅުމާގުޅިގެން ސޫޓީ މޯލްޑް (ކަޅުކޫޑި) އަޅާގޮތްވެއެވެ. މިފަދަ ފަނިފަކުސަ ކޮންޓްރޯލްކުރުމަށް އިންސެކްޓިސައިޑެއް ސްޕްރޭކުރާށެވެ.

މައުލޫމާތު: ދަނޑުވެރިކަމާ ބެހޭ ވުޒާރާ