ގޫގުލްއާ ދެކޮޅަށް ރަޝިޔާގެ 17 ޓީވީ ޗެނަލަކުން ބަދަލު ހޯދުމަށް އެދުނު ފައިސާގެ ޖުމްލަ އަދަދު 2 އަންޑެސިލިއަން ރޫބަލް އަށް އަރާ ކަމަށް ބުނެ މޮސްކޯގެ ކޯޓަކުން ހުކުމް ކޮށްފިއެވެ.
އަންޑެސިލިއަން ގައި ހިމެނޭނީ، 36 ސުމެކެވެ.
އެމެރިކާ ޑޮލަރުން ދެ އަން ޑެސިލިއަން ރޫބަލް އަކީ، 2.5 ޑެސިލިއަން އެމެރިކާ ޑޮލަރެވެ.
މިއީ ދުނިޔޭގެ ތާރީޚުގައި މިހާ ބޮޑު އަދަދެއްގެ ބަދަލަކަށް ޙުކުމް ކުރި ފަހަރެވެ.
މިއީ 2020ން ފެށިގެން ޔޫޓިއުބުން މި ޗެނަލްތައް ބްލޮކް ކުރުމުން އަރަމުން ގޮސްފައިވާ އަދަދުތައް ކަމަށް ކޯޓުން ބުނެފައި ވެއެވެ.
ޑެސިލިއަން އަކީ ކިހާވަރެއް ބާވައެވެ؟
މިއީ އަހަރަމެންވެސް އަޑު އަހާފައިވާ ޒާތެއްގެ އަދަދެއް ނޫން ކަމުން ހޯދައި ތިލަކޮށްލި މައުލޫމާތުން އަންނަނިވި ތަފްސީލު އެނގުނެވެ!
ޑެސިލިއަން ގައި ހިމެނޭނީ 33 ސުމެކެވެ.
މިލިއަނަކުން ފެށިގެން ގުނާނަމަ، ތަރުތީބުން: މިލިއަން، ބިލިއަން، ޓްރިލިއަން، ކުއަޑްރިލިއަން، ކުއިންޓިލިއަން، ސަކްސްޓިލިއަން، ސެޕްޓިލިއަން، އޮކްޓިލިއަން، ނޮނިލިއަން، އެއަށްފަހު ޑެސިލިއަން އެވެ.
މިދިޔަ އަހަރު ގޫގުލްގެ ފައިދާއަކީ 307 ބިލިއަން ޑޮލަރެވެ. މި އަދަދުން ހިސާބު ޖަހައިފިނަމަ، ގޫގުލްއަށް 2.5 ޑެސިލިއަން ޑޮލަރު ލިބޭނީ ގާތްގަނޑަކަށް 9 އަހަރުންނެވެ.
އޮކްޓޯބަރު 28 ވީ ހޯމަ ދުވަހު ބޭއްވި ޝަރީޢަތުގައި ގާޒީވެސް ފާހަގަ ކުރެއްވީ، ބޮލުގައި ރިއްސާހައި ގިނަ އަދަދަކަށް ބައިވަރު ސުންތަކެއް ހުރި ކަމަށް މި ޚަބަރު ގެނަސްދިން މޮސްކޯގެ އާރްބީސީން ބުންޏެވެ.
މިއީ ކުރިން ކޮށްފައިވާ ޙުކުމެއްގެ އިސްތިއުނާފީ ޙުކުމެކެވެ. ކުރިން ކުރި ޙުކުމްގައި ގޫގްލްއަށް އަމުރު ކޮށްފައި ވަނީ މި ޗެނަލްތައް ބްލޮކް ނުކުރުމަށެވެ. އަދި ކޯޓު އަމުރަށް ތަބާ ނުވެއްޖެ ހާލަތެއްގައި ޖުރިމާނާ ނަގައި ދޭނެ ކަމަށެވެ. އަދި ކޯޓުގެ ނިންމުމަށް އަމަލުކުރަން އަންގާ ތާރީޚުން ފެށިގެން ނުވަ މަސް ދުވަހުގެ ތެރޭގައި ޙުކުމް ތަންފީޒު ނުކޮށްފިނަމަ އެ ޙުކުމަށް އަމަލު ނުކުރާ ކޮންމެ ދުވަހަކަށް 100 ހާސް ރުފިޔާއިން ޖޫރިމަނާ ކުރެވޭނެ ކަމަށެވެ. އަދި އެ ނިންމުމަށް އަމަލު ކުރެވެންދެން ކޮންމެ ހަފްތާއަކު އެ އަދަދު ދެގުނައަށް އިތުރުވާނެ ކަމަށާއި ޖޫރިމަނާގެ ޖުމްލަ އަދަދު މަތިވެގެން ދިޔައަސް އެކަމަށް އެއްވެސް ލިމިޓެއް ނެތެވެ.
މި ދައުވާގައި ބައިވެރިވި ވަކީލަކު ބުނެފައި ވަނީ ސެޕްޓެމްބަރު މަހާހަމައަށް ޖުމްލަ ޖޫރިމަނާގެ އަދަދަކީ ގާތްގަނޑަކަށް 13 ޑިސިލިއަން (އެއް ޑިސިލިއަން އަށް ފަހު 33 ސުމެއް) އޮންނަ އަދަދެއް ކަމަށެވެ.
ރަޝިޔާގެ މީޑިއާ ކުންފުނިތަކާއި ގޫގުލްއާ ދެމެދު ކޯޓުގައި ދައުވާތައް ފެށުނީ 2020 ވަނަ އަހަރު ޔޫޓިއުބުން ސާގްރަޑް ޓީވީ ޗެނަލާއި ރިއާ ފޭންގެ އެކައުންޓްތައް ބްލޮކް ކުރުމުންނެވެ. އަދި 2020 ވަނަ އަހަރުގެ އޮގަސްޓް މަހު ޒާގްރަޑް އިން ވަނީ ބްލޮކު ކުރުން ބާތިލް ކުރުމަށް އެދި މޮސްކޯ އާބިޓްރޭޝަން ކޯޓުގައި ދައުވާކޮށްފައެވެ.
ދައުވާ ލިބޭ ފަރާތްތަކަކީ އެމެރިކާގެ ގޫގުލް ލިމިޓެޑް ލަޔަބިލިޓީ ކުންފުންޏާއި އާއި އަޔަލޭންޑްގެ ގޫގުލް އަޔަލޭންޑްގެ އިތުރުން ރަޝިޔާގެ ގޫގުލް އެލްއެލްސީގެ މަންދޫބެކެވެ.
2021 ވަނަ އަހަރު ކޯޓުން ވަނީ އާބިޓްރޭޝަންގެ ނިންމުން ތަންފީޒު ނުކޮށްފިނަމަ ޖޫރިމަނާއެއް ކުރާނެ ކަމުގެ އިންޒާރު ދީ، ބްލޮކްކޮށްފައިވާ އެކައުންޓްތަކަށް ވަދެވޭ ގޮތް ހެދުމަށް ގޫގުލްއަށް އަމުރުކޮށްފަ އެވެ.
އެއަށްފަހު 2022ގައި ޝަރީއަތެއް ހިނގައި، ރަޝިޔާގެ ފެޑެރަލް އެންޓިމޮނޮޕޮލީ ސާވިސް (އެފްއޭއެސް) އިން ހުކުމް ކުރީ، ރަޝިޔާގެ ކުންފުނީގެ ގާނޫނާއި ގޫގުލް ޚިލާފްވެފައިވާ ކަމަށެވެ.
އެއިރު ޖުރިމާނާ ކުރީ 4 ބިލިއަން ރޫބަލް އިންނެވެ.
އަދި އެހެން ދައުވާއެއްގައި، 2022ވަނަ އަހަރުގެ ޖޫން މަހު ރަޝިޔާގައި ގޫގުލް ތަމްސީލު ކުރާ ގޫގުލް އެލްއެލްސީން، އެކުންފުނި އިފްލާސްވެފައިވާ ކަމަށް ބުނެ ދައުވާއެއް ހުށަހެޅިއެވެ. އެއިރު ގޫގުލްއިން ކޯޓުގައި ބުނީ ދަރަނިތައް 19 ބިލިއަން ރޫބަލް އަށް ވުރެ މައްޗަށް ގޮސްފައިވާ ކަމަށާއި، އެސެޓްތަކުގައި ހުރީ އެންމެ 3.5 ބިލިއަން ރޫބަލް ކަމަށެވެ. އެއާއެކު، ނޮވެމްބަރު 2023 ގައި ކޯޓުން ވަނީ ގޫގުލް ބަނގުރޫޓުވެފައިވާ ކަމަށް ކަނޑައަޅައި ޙުކުމް ކޮށްފަ އެވެ.
ރަޝިޔާގެ ގޫގުލް ބަނގުރޫޓު ވުމުން ދެން ދައުވާކޮށްފައިވާ ގޫގުލް އަޔަރލެންޑާ ދެކޮޅަށެވެ.
އެއަށްފަހު ސާގްރަޑް ޓީވީ ޗެނަލުން ކުރި ދައުވާތަކަށް އެ ޗެނަލަށް 32.7 ބިލިއަން ރޫބަލް ދޭން ޖެހޭކަމަށް، 2024 ވަނަ އަހަރުގެ އޮގަސްޓް މަހު ސުޕްރީމް ކޯޓުން ހުކުމްކުރިއެވެ.
ރަޝިޔާގެ މީޑިއާ ހައުސްތަކުން ވަނީ ތުރުކީ، ހަންގޭރީ، ސްޕެއިން، ދެކުނު އެފްރިކާ އަދި އެހެން ގައުމުތަކުގެ ކޯޓުތަކުގައި ވެސް ރަޝިޔާގައި ގޫގުލްއާ ދެކޮޅަށް ނިންމާ ޙުކުމްތައް ބަލައިގަނެ ތަންފީޒު ކުރުމަށް އެދިފަ އެވެ. ޖޫން މަހު ދެކުނު އެފްރިކާގެ ހައިކޯޓުން ވަނީ އެގައުމުގައި ހުރި ގޫގުލްގެ އެސެޓްތައް ހިފެހެއްޓުމަށް އެދުމުން އެކަމަށް ރުހުންދީފައެވެ.
އޭގެ އިތުރުން ގޫގުލް އިން ވެސް ވަނީ ރަޝިޔާގެ މީޑިއާ ހައުސްތަކުގެ ވެރިންނާ ދެކޮޅަށް މިދިޔަ އޮގަސްޓް މަހު އެމެރިކާ އާއި އިނގިރޭސިވިލާތުގެ ކޯޓުތަކުގައި ދައުވާކޮށްފަ އެވެ.
ގޫގުލްގެ ބެލެނިވެރި ކުންފުނި އަލްފަބެޓް އިން 2024 ވަނަ އަހަރުގެ ދެވަނަ ކުއާޓަރުގައި ނެރުނު ރިޕޯޓުގައިވެސް ބުނެފައި ވަނީ "ގޫގުލްއާ ބެހޭ ގާނޫނީ މައްސަލަތަކެއް ރަޝިޔާގައި ހިނގަމުންދާ" ކަމަށެވެ. އަދި އެކަމުން ގޫގުލްގެ ވިޔަފާރިއަށް ބުރޫ ނާރާނެ ކަމަށެވެ.
