ވޭތުވެދިޔަ ދިހަ އަހަރު ތެރޭގައި އިންޑިއާގެ ޑިޖިޓަލް ތަރައްގީއަށް އަލިއަޅުވާލައްވަމުން އިންޑިއާ މޮބައިލް ކޮންގްރެސް 2024 ގައި އިންޑިއާ ބޮޑު ވަޒީރު ވިދާޅުވީ އިންޑިއާއަކީ ދުނިޔޭގައި މޮބައިލް ޑޭޓާ އެންމެ އަގުހެޔޮ، ޤައުމު ކަމަށެވެ. ދުނިޔޭގެ އެންމެ އަގު ހެޔޮކޮށް މޮބައިލް ޚިދުމަތް ދޭ ޤައުމަކީވެސް އިންޑިއާއެވެ. އިންޑިއާގައި މޯބައިލް ޑޭޓާ ރޭޓް އުޅެނީ 12 ސެންޓްގައެވެ.
ބާރަތު މަންޑަޕަމް ކޮންވެންޝަން ސެންޓަރުގައި ވާހަކަފުޅު ދައްކަވަމުން މޯދީ ވިދާޅުވީ އެހެން ގައުމުތަކުން މިފަދަ ޑޭޓާގެ ޚިދުމަތް ދޭން "10 އިން 12 ގުނަ އިތުރަށް" އަގު ނަގާ ކަމަށެވެ.
މި ކާމިޔާބީ އޭނާ ސިފަ ކުރެއްވީ ވާދަވެރިކަން އިތުރުވުމުގެ ނަތީޖާގެ ގޮތުގައެވެ. މިއީ، 2016 ވަނަ އަހަރު ރިލަޔަންސް ޖިއޯ ކުންފުނިން އިންޑިއާގެ މޮބައިލް މާކެޓަށް ވަން ފަހުން ޓެލެކޮމް އޮޕަރޭޓަރުންގެ މެދުގައި އުފެދުނު ވަރުގަދަ ވާދަވެރިކަމެއްގެ ނަތީޖާ ކަމުގައި އޭނާ ވިދާޅުވިއެވެ.
"އެންމެ ދިހަ އަހަރު ތެރޭގައި ދުނިޔެއާއި ހަނދާ ދެމެދުގެ ދުރުމިނުގެ ރާސްތާގެ 8 ގުނަ ދުރުމިން ކަވަރު ކުރެވޭ ވަރަށް އިންޑިއާއިން ފައިބަރު އަޅައިފިން،" ޑިޖިޓަލް އިންޑިއާގެ އިސްނެގުމުގެ ދަށުން އިންޑިއާގެ އިންފްރާސްޓްރަކްޗާ ތަރައްގީ ކުރުމަށް ކޮށްފައިވާ މަސައްކަތަށް އަލިއަޅުވާލައްވަމުން މޯދީ ވިދާޅުވި އެވެ.
1.2 ބިލިއަން މޯބައިލް ޔޫޒަރުންނާއި 950 މިލިއަން އިންޓަނެޓް ޔޫޒަރުންނާއެކު އިންޑިއާގެ ޑިޖިޓަލް ލޭންޑްސްކޭޕް ވަނީ 2015 ވަނަ އަހަރުން ފެށިގެން އެއް ވާނެއްގައި ކުރިއަށް ގޮސްފައެވެ. އިންޑިއާގެ މޮބައިލް އަގުތައް ކުޑަވުމުން މުޅި އިންޑިއާގެ ސިޓީތަކާއި ރަށްރަށުގައި އިންޓަނެޓްގެ ޚިދުމަތް އާންމުންގެ އަތް ފޯރާ ފަށަށް ގެނެވިފައި ވެއެވެ.
މޮދީ ވަނީ އިންޑިއާއިން 6ޖީ ތަރައްގީ ކުރުމަށް މަސައްކަތް ކުރަމުންދާކަންވެސް ވޯލްޑް ޓެލެކޮމިއުނިކޭޝަން ސްޓޭންޑަޑައިޒޭޝަން އެސެމްބްލީ އާއި އިންޑިއާ މޮބައިލް ކޮންގްރެސް ގުޅިގެން ކުރިއަށް ގެންދިޔަ ހަރަކާތުގައި އިޢުލާން ކުރައްވާފައެވެ.
