ޗައިނާގައި އުފައްދާ ކާރުތަކަށް އާދަޔާ ޚިލާފް ބޮޑު ޑިއުޓީއެއް ނެގުމަށް ޔޫރަޕްގެ ޖަމާއަތުން ނިންމައިފިއެވެ. އެ ޖަމާއަތުން ބުނަނީ ޗައިނާ ސަރުކާރުން އިލެކްޓްރިކް ކާރު އުފައްދާ ފަރާތްތަކަށް ދޭ އެހީގެ ސަބަބުން ޔޫރަޕްގެ މާކެޓްތަކުގައި ޗައިނާ އިލެކްޓްރިކް ކާރުތަކާ ދެކޮޅަށް ޔޫރަޕްގެ ކާރުތަކަށް ވާދަ ނުކުރެވޭ ކަމަށެވެ.
ޗައިނާގެ ކާރުތައް ޔޫރަޕްގައި ވިއްކަން ފެށުމުން 1 ޕަސެންޓްގައި އޮތް ވިޔަފާރި ވަނީ ކުރު މުއްދަތުގެ ތެރޭގައި 14 ޕަސެންޓަށް އިތުރު ވެފައެވެ. ޗައިނާގެ އިލެކްޓްރިކް ކާރުތަކަކީ އޭގެ ޑިޒައިނާއި އެތެރޭގައި ހިމެނޭ ފަސޭހަތަކާއެކު އެހެން ކާރުތަކާ ވާދަ ކުރޭވަރަށް ވުރެން ފެންވަރު މަތީ އުޅަނދުތަކެކެވެ.
ޔޫރަޕްގެ ޖަމާއަތުން ޗައިނާ ކާރަށް ޑިއުޓީ ބޮޑު ކޮށްފައި ވަނީ، އެއް އަހަރު ދުވަސްވަންދެން ދިރާސާކޮށްފައި ކަމަށްވެސް ޔޫރޯ ނިއުސްއިން ބުނެއެވެ.
ޗައިނާގެ ކާރުތަކުގެ އަގު ބޮޑުކުރުމަށް، ޔޫރަޕުން އަލަށް ތައާރަފް ކުރާ ޑިއުޓީއަކީ މިހާރުވެސް ނަގަމުންދާ 10 ޕަސެންޓްގެ އިތުރުން ނަގާނެ ޑިއުޓީއެކެވެ. ކޮންމެ ބްރޭންޑަކަށްވެސް ނަގާ ޑިއުޓީ ތަފާތު ކަމަށް ބުނެފައި ވެއެވެ. އެގޮތުން ބައެއް ބްރޭންޑްތަކަށް ނަގާ ޑިއުޓީ 48 ޕަސެންޓަށް އަރައެވެ.
ކެނެޑާއާއި އެމެރިކާއިން ޗައިނާގެ އުޅަނދުތަކަށް 100 ޕަސެންޓް ޑިއުޓީ ނަގައެވެ.
