ސައުދީ އަރަބިއްޔާއިން ޕާކިސްތާންގައި 2.2 ބިލިއަން ޑޮލަރު އިންވެސްޓް ކުރުމަށް ޖުމުލަ 34 ފަހުމުނާމާއެއްގައި ސޮއިކޮށްފިއެވެ. މިއަދަދަކީ ކުރިން ނިންމާފައިވާ އަދަދުގެ ތެރެއަށް އަލަށް ސޮއިކޮށްފައިވާ 600 މިލިއަން ޑޮލަރުގެ 27 ފަހުމުނާމާ އެއްކޮށްލުމުން ޖެހޭ ޖުމުލަ އަދަދެވެ.
ރިޔާޟްގައި މިކަން އިއުލާން ކުރެއްވީ ޕާކިސްތާންގެ ބޮޑުވަޒީރު ޝެހްބާޒް ޝަރީފާއި ސައުދީގެ އިންވެސްޓްމަންޓް މިނިސްޓަރު ޚާލިދު ބިން އަބްދުލްއަޒީޒް އަލް ފާލިހް ގުޅިގެން ބޭއްވެވި ޕްރެސް ކޮންފަރެންސެއްގައެވެ.
ދެފަރާތުން ވަނީ، ވިޔަފާރިއާއި، މާލީ ދާއިރާއާއި ދަނޑުވެރިކަން، ޓެކްނޮލޮޖީ، އަދި ހުނަރުވެރި ކަން އިތުރު ކުރުމަށާއި އިތުރު އެހެނިހެން ދާއިރާތަކުން ދެ ގައުމުގެ އެއްބާރުލުމަށް މަޝްވަރާ ކޮށްފައެވެ.
