ސައުދީ އަރަބިއްޔާއަށް ކުރެއްވި ދަތުރުފުޅަށް ފަހު ޕާކިސްތާން ބޮޑުވަޒީރު ޝެހްބާޒް ޝަރީފް ދެ ދުވަހުގެ ރަސްމީ ދަތުރުފުޅެއްގައި ދޯހާއަށް ވަޑައިގެންފިއެވެ. މިއީ ގަތަރުގެ އަމީރު ޝެއިޚް ތަމީމް ބިން ހަމަދު އާލަސާނީގެ ދައުވަތަކަށް ކުރައްވާ ދަތުރުފުޅެކެވެ.
ޕާކިސްތާން ބޮޑުވަޒީރު ޝެހްބާޒް ޝަރީފަށް ދޯހާ އިންޓަނޭޝަނަލް އެއާޕޯޓުން މަރުޙަބާ ދެންނެވީ، ގަތަރުގެ މިނިސްޓަރު އޮފް ސްޓޭޓް މުހައްމަދު ބިން އަބްދުލްއަޒީޒް އަލް ޚުލައިފީ އެވެ.
ދޯހާގައި ޕާކިސްތާން ބޮޑުވަޒީރު ދެ ގައުމުގެ ގުޅުން މުރާޖައާކުރައްވައި ވިޔަފާރިއާއި އިންވެސްޓްމަންޓްގައި އެއްބާރުލުން ދިނުމުގެ ފުރުސަތުތަކަށް މަޝްވަރާ ކުރައްވާނެއެވެ.
ޝެހްބާޒް ޝަރީފް، ގަތަރު އިންވެސްޓްމަންޓް އޮތޯރިޓީ (ކިޔުއައިއޭ) އާއި ގަތަރު ބިޒްނަސްމަން އެސޯސިއޭޝަން (ކިއުބީއޭ) ގެ ވަފުދުތަކާ އެކުވެސް މަޝްވަރާ ކުރައްވައި، ޕާކިސްތާނުގައި ހުރި އިންވެސްޓްމަންޓް ފުރުސަތުތަކުގެ ފައިދާ ނެގުމަށް އެދިވަޑައިގެން ހުށަހެޅުންތައް ހުށަހަޅުއްވާނެ ކަމަށް ޕާކިސްތާން ބޮޑު ވަޒީރު އޮފީހުން ބުނެއެވެ.
