ޕާކިސްތާންގެ ލާހޯރުގައި ދުން ބޯވެ، ނޭވާލާން އުނދަގޫވާ މިންވަރަށް ވެށި ނުފާސުވުމުން ތިމާވެށީގެ ފުރަބަންދެއް، ޕަންޖާބުގެ ޗީފް މިނިސްޓަރ މަރްޔަމް ނަވާޒް ޝަރީފް ތަޢާރަފް ކުރައްވައިފިއެވެ.
އޭނާ ތައާރަފް ކުރައްވާފައިވާ ތިމާވެށީގެ ފުރަ ބަންދުގައި، ބައެއް ވައި ނުސާފު ސަރަހައްދުތަކާއި އެތަންތާނގެ ވަށައިގެންވާ އެއް ކިލޯމީޓަރުގެ ސަރަހައްދުގެ އޭރިއާއެއްގައި ކޮންސްޓްރަކްޝަންގެ އެއްވެސް މަސައްކަތެއް ނުކުރުމަށް އަންގާފައި ވެއެވެ.
އޭގެ އިތުރުން ކަނޑައަޅާފައިވާ ވައި ނުސާފު ސަރަހައްދުތަކުގައި، އަމިއްލަ މީހުން ހިންގާ ޖަނަރޭޓަރުތަކާއި ތެޔޮ އަޅައިގެން ދުއްވާ ރަށު ޕިކަޕާއި އޮޓޯ ބޭނުން ކުރުން މަނާކޮށްފައި ވެއެވެ.
ރޭގަނޑު 8 ގެ ފަހުން ހާމަތަންތާނގައި ބާބަކިއު ހެދުންވެސް މަނާކޮށްފައިވެ އެވެ. އަދި ޗާކޯލް، ކޯލާ ދެލި އަންދައިގެން ނުވަތަ ލަކުޑި ބޭނުންކޮށްގެން ކާބޯތަކެތި އުފައްދައި ވިއްކާ ތަންތަނުގައި ވެސް ދުން މައްޗަށް ބޭރުކުރުމަށް ދުން ހޮޅި ލުމަށް އަންގާފައި ވެއެވެ.
ކައިވެނި ހޯލުތައް ރޭގަނޑު 10 ޖަހާއިރު ބަންދު ކުރަން އަންގާފައި ވެއެވެ.
މަގުމަތި ކުނިކަހައި ހިރަފުސް ބުރުވުމުގެ ބަދަލުގައި ފެން ޖަހައިގެން ސާފުކުރުމަށް އަންގާފައި ވެއެވެ.
ބޮޑެތި ބަރު އުޅަނދުތައް ދުއްވުން މަނާކޮށް އޮފީސް މުވައްޒަފުންގެ ދެބައިކުޅަ އެއްބައި މީހުން ގޭގައި ތިބެގެން މަސައްކަތް ކުރަން އަންގާފައި ވެއެވެ.
