އިޒްރޭލަށް ގޯވާތަކެތި ހިފައިގެން ދަތުރުކުރި ބޯޓު އެތައް ބަނދަރަކަށް ވަނުމަށް މަނާ ކުރުމުން، އެންމެފަހުން މިސްރުން އެ ބޯޓު ބަލައިގަނެ އޭގައި ހުރި ޒަޔަނިސްޓުންގެ ގޮވާތަކެތި ހުސްކޮށްދީފިއެވެ.

ފަލަސްޠީނުގައި އިންދާފައިވާ ޒަޔަނިސްޓު ނިޒާމަށް ގޮވާތަކެތި ހިފައިގެން ދަތުރު ކުރި ޖަރުމަނުގެ މުދާ އުފުލާ ބޯޓު އެމްވީ ކެތުރިން އަށް ސްޕެއިންއާއި މޯލްޓާއާއި އެންގޯލާއާއި ނެމީބިޔާއިންވެސް ވަނީ ބަނދަރަށް ވަނުމަށް ހުއްދަ ނުދީފައެވެ. އެ ބޯޓަށް ހުއްދަ ދީފައި ނުވަނީ ގަތުލުއާންމު ހިންގުމަށް ހަތިޔާރު އުފެއްދުމަށް ބޭނުންވާ ގޮވާތަކެއްޗާއެކު ދަތުރު ކުރުމުންނެވެ.

ކުރިން މި ބޯޓު ދަތުރުކުރީ ޕޯޗުގަލްގެ ދިދަ ޖަހައިގެންނެވެ. ނަމަވެސް ޕޯޗުގަލްއިން އެކަމާ ދެކޮޅު ހެދުމުން ޖަރުމަން ދިދައަށް ބަދަލުކޮށްލީއެވެ. އެންމެ ފަހުން ރެޑްސީންވެސް ދަތުރު ނުކުރެވިގެން އެބޯޓު ގޮސް ވަނީ މިސްރުގެ އިސްކަންދަރިއްޔާ ބަނދަރަށެވެ. އެ ބަނދަރުގައި ބޯޓުގެ އެޖެންޓު ވަނީ އެތަކެތި ބޯޓުން ބާލާފައެވެ.

މިސްރަކީ ޖޯޑަން އެކޭ އެއްފަދައިން ޒަޔަނިސްޓު ނިޒާމަށް ހަތިޔާރު ސަޕްލައިކޮށްދޭން އެހީތެރިވެދޭ ޤައުމެއް ކަމަށް ލޭބަލްކޮށްފައިވާ ޤައުމެކެވެ.

މި ބޯޓު ދަތުރުކުރަމުން ދިޔަތާ ދެ މަހަށް ވުރެ ގިނަ ދުވަސް ވެފައި ވެއެވެ.

އެމްވީ ކެތުރިން އިން އިޒްރޭލަށް އުފުލައި ދެނީ، މިލިޓަރީ ގްރޭޑްގެ ގޮވާ މާއްދާއެއް ކަމަށްވާ 150،000 ކިލޯގެ އާރުޑީއެކްސް ގޮވާތަކެއްޗެވެ.

މި މުދާ ލިބިގަންނަނީ، އިޒްރޭލުގެ އެންމެ ބޮޑު އަސްކަރީ ކުންފުނި އެލްބިޓް ސިސްޓަމްސްގެ ސަބްސިޑަރީއެއް ކަމަށްވާ އިޒްރޭލު މިލިޓަރީ އިންޑަސްޓްރީސް އިންނެވެ.

އާރްޑީއެސްއަކީ، ބޮމާއި މޯޓަރު އަދި ރޮކެޓް އުފެއްދުމުގައު ބޭނުންކުރާ ގޮއްވާލާ މާއްދާއެވެ.

އިތުރު ލިޔުންތައް