ފިއުޗާ އިންވެސްޓްމަންޓް އިނިޝިއޭޓިވް (އެފްއައިއައި) އިންސްޓިޓިއުޓުން ދާދި ފަހުން ކުރި ގްލޯބަލް ސާވޭއަކުން ދައްކަނީ، ދިރިއުޅުމުގެ ހިތްހަމަޖެހުމުގައި 24 ގައުމެއްގެ ތެރެއިން ދެކުނު ކޮރެއާ އެންމެ ފުލުގައި އުޅޭ ކަމަށެވެ.
ކޮރެއާގެ މީހުންގެ ތެރެއިން 61 ޕަސެންޓް މީހުން ބުނެފައި ވަނީ އެމީހުންގެ ދިރިއުޅުމާމެދު ހިތްހަމަ ނުޖެހޭ ކަމަށެވެ. އެއާޚިލާފަށް، މި ސާވޭއިން ފާހަގަކޮށްފައިވަނީ ސަޢޫދީ ޢަރަބިއްޔާ އާއި އިންޑިއާއާއި މިސްރު ފަދަ ގައުމުތަކުގައި މީހުންގެ ހިތްހަމަ ޖެހުމުގެ ނިސްބަތް އިތުރު ކަމަށެވެ. އެގައުމުތަކުގައި ހިތްހަމަ ނުޖެހުން އުޅެނީ 16 އިންސައްތައިގައެވެ.
މި ސާވޭއަކީ، ތަރައްގީވެފައިވާ އަދި ތަރައްގީވަމުން އަންނަ ގައުމުތަކުގައި ތަފާތު ދާއިރާތަކުގެ 50،000 އަށް ވުރެ ގިނަ މީހުންނާ ސުއާލުކޮށް އެކުލަވާލާފައިވާ ސާވޭއެކެވެ.
ސާވޭ ކުރިއަށް ގެންދިޔަ، އެފްއައިއައިގެ ސާވޭއިން ހާމަވެފައިވަނީ މާއްދީ ކަންކަމާއި ދީނީ އަޤީދާ ގަބޫލުކުރުމާއި ވެރިކަމުގެ ނިޒާމުތައް ފަދަ ކަންތައްތަކުން ޤައުމުތަކުގައި ދިރިއުޅުމުގެ ހިތްހަމަޖެހުމުގެ މިންވަރު ބައްޓަންވެދާނެ ގޮތެވެ.
ދެކުނު ކޮރެއާގައި މީހުންގެ ހިތްހަމަ ނުޖެހުމަށް އަސަރުކުރާ ކަންކަމަކީ، ވަޒީފާގެ ޕްރެޝަރާއި މީހާ ބަހައްޓަން ޖެހޭ އިޖުތިމާއީ ހައިސިއްޔަތުން އަންނަ ޕްރެޝަރާއި މުޖުތަމައުގެ ނަޒަރުގައި މީހާގެ ކާމިޔާބީގެ އުންމީދުތަކުގެ ސަބަބުން ކުރިމަތިވާ ވާދަވެރިކަމާއި އުޅެން ޖެހޭ މަތީ ފެންވަރާއި މާއްދީ ޕްރެޝަރުތައް ކަމަށް ދައްކައެވެ.
ކޮންސިއުމެރިޒަމަށް ބާރުއަޅާ ކޮރެއާގައި ގިނަ ބަޔަކަށް ދިރިއުޅުމުގެ ޚަރަދަކީ މައިގަނޑު ކަންބޮޑުވުމެކެވެ. މި ސާވޭން ހާމަވަނީ، ބޯހިޔާވަހިކަމާއި ދިރިއުޅުމުގެ ޚަރަދާއި މުޖުތަމައުގެ އުންމީދުތައް ބެލެންސްކުރުމުގައި ގިނަ ބަޔަކަށް ކުރިމަތިވާ މާލީ ޕްރެޝަރުތައް ބޮޑު ކަމަށެވެ.
މިއާ ޚިލާފަށް ސަޢުދީ އަރަބިއްޔާ އާއި އިންޑިއާ ފަދަ ގައުމުތަކުގައި ރައްޔިތުންގެ ދިރިއުޅުމުގެ ހިތްހަމަޖެހުން މަތި ކަމަށް އެފްއައިއައިގެ ސާވޭން ދައްކައެވެ. އެ ޤައުމުތަކުން ފެންނަނީ، އާއިލީ ބަދަހި ގުޅުމާއި އަގީދާއާއި އީމާންތެރިކަމާއި އިޖުތިމާޢީ ގުޅުމުގެ މާއްދީ ނޫން އަގުތަކަށް ސަމާލުކަން ދޭކަމެވެ. މި ސާވޭގައި ދިރިއުޅުމުގެ ހިތްހަމަޖެހުން މަތި ގައުމުތަކުން ފެންނަނީ، ދީނާއި ރޫޙާނީ ކަންކަމާއި ހިތްހަމަޖެހިގެން އުޅުމާ ގުޅުމެއްވާ ކަމަށެވެ.
މީހުން ގިނައިން ހިތްހަމަޖެހިގެން އުޅޭކަމަށް ޚިޔާލު ފާޅުކުރި ސަޢޫދީ އަރަބިއްޔާ އާއި އިންޑިއާގައި ކަންކަމަށް ޝުކުރުވެރިވުމާއި އިޖުތިމާއީ ގުޅުމާއި ކެތްތެރިކަމަށް ބާރުއަޅާ ވަރުގަދަ ދީނީ ސަގާފަތްތަކެއް އޮންނަކަމަށްވެސް ފާހަގަ ކޮށްފައި ވެއެވެ.
މިއާ ޚިލާފަށް ދެކުނު ކޮރެއާ، ޖަޕާން، އަދި ފްރާންސް ފަދަ ސެކިއުލަރ މުޖުތަމަޢުތަކުގައި ފަރުދީ ވަންތަކަށް ބާރުއަޅައި، ކާމިޔާބީއާއި އިޤްތިޞާދީ ތަނަވަސްކަމާ ގުޅިފައިވާތީ، އިޤްތިޞާދީ ނުވަތަ އިޖުތިމާޢީ ޙާލަތްތައް ދަށްވުމުން ހިތްހަމަނުޖެހުމުގެ އިޙްސާސް ބޮޑުވާކަމަށް ވެސް ދައްކައެވެ.
އަދި ކޮރެއާގެ އެންމެ 14 އިންސައްތަ މީހުން ދިރިއުޅުމާ މެދު ހިތްހަމަޖެހުން ފާޅުކޮށްފައިވާ އިރު، ޗައިނާ، ސަޢޫދީ ޢަރަބިއްޔާ އަދި އިންޑިއާ އިން ސާވޭއަށް ޖަވާބު ދިން މީހުން ބުނެފައި ވަނީ އެމީހުންނަށް އެމީހުންގެ ގައުމުތަކުގެ ޙާލަތާ މެދު ވެސް ހިތްހަމަޖެހުން ބޮޑު ކަމަށެވެ. އަދި އެ ގައުމުތަކުގައި ވެރިކަމުގެ ނިޒާމާ މެދު އިތުބާރު އޮތްކަމަށްވެސް އެމީހުން ބުނެއެވެ.
މި ސާރވޭއިން ދައްކަނީ، ދިރިއުޅުމުގެ ހިތްހަމަޖެހުމާއި ޤައުމެއްގެ އިޖުތިމާޢީ، އިޤްތިޞާދީ، އަދި ސަޤާފީ އަގުތައް ގުޅިފައިވާ ކަމެވެ.
