އަފްޣާނިސްތާނުގެ ފޮރިން މިނިސްޓަރު އާމިރު ޚާން މުއްތަޤީ، ކާބުލްގެ މަގުމަތީގައި ސައިކަލުގައި ދަތުރު ކުރައްވާ ވީޑިއޯއެއް ސޯޝަލް މީޑިއާގައި ވައިރަލްވެފައިވެއެވެ. އެ ވީޑިއޯއިން ތާލިބާނުންގެ ވެރިކަމުގައި ސަލާމަތީ ކަންކަން ރަނގަޅުވަމުންދާ މަންޒަރު ހާމަވާ ކަމަށް މީހުން ބުނެ އެވެ.
އަފްޣާން ފޮރިން މިނިސްޓްރީގެ އޮފިޝަލުންވެސް ވަނީ އެއީ ސައްހަ ވީޑިއޯއެއް ކަމަށާއި އެއީ ވަޒީރު މުއްތަޤީކަން ކަށަވަރުކޮށްދީފައެވެ.
މިހަފްތަގައި ނަގާފައިވާ ވީޑިއޯއިން ފެންނަނީ އަފްޣާނިސްތާނުގެ ވެރިރަށް ކާބުލްގެ ވަޒީރު އަކްބަރު ޚާން ސަރަހައްދުގައި އިރާކޮޅު، އަމީރު ޚާން މުއްތަޤީ ސައިކަލުގައި އަމިއްލައަށް ދުއްވާފައި ވަޑައިގަންނަވާ މަންޒަރެވެ.
ވަޒީރު އަކުބަރު ޚާން އަވަށަކީ، ކާބުލްގެ ރިއާސީ ގަނޑުވަރާ އެއް ކިލީމީޓަރު ދުރުގައި އޮންނަ އެމްބަސީތައް ހުންނަ ސަރަހައްދެވެ.
މީސްމީޑިއާގައި މި ވީޑިއޯ ޕޯސްޓު ކުރި މީހުން ބުނެފައި ވަނީ ސެކިއުރިޓިއާ ނުލައި ޚާރިޖީ ވަޒީރަކަށް ސައިކަލުގައި އުޅެން ކެރޭނީ ދުނިޔޭގެ ކޮން ގައުމެއްގައި ތޯއެވެ؟
