އިންޑިއާގައި އިންޖިނިއަރިންގ ކިޔަވައިދޭ ކޯސްތަކަށް ވަންނަން ބޭނުންވާ ކުދިންގެ އަދަދު އަނެއްކާވެސް އިތުރުވާން ފަށައިފިއެވެ. ޓައިމްސް އޮފް އިންޑިއާއިން ބުނަނީ، އިންޖިނިއަރިންގއަށް ކުދިން ޝައުގުވެރި ވަނީ، އާޓިފިޝަލް އިންޓެލިޖެންސް (އޭއައި) އެޕްލިކޭޝަންތައް ހަލުވިކަމާއެކު ފުޅާވުމުން ދިއުމާ ގުޅިގެންނެވެ. މިއީ ޓެކްނޮލޮޖީ އެޑިއުކޭޝަންގެ ދާއިރާގެ ކަންކަން އަލުން ބައްޓަން ކުރަމުންދާ ޑޭޓާ ސައިންސް، މެޝިން ލާނިން، އަދި ރޮބޮޓިކްސް ފަދަ އޭއައިއަށް ބާރުއަޅާ ދާއިރާތަކަށް ޑިމާންޑް ބޮޑުވުމުގެ ނަތީޖާއެއް ކަމަށް ދައްކައެވެ.
ބައެއް ސިޓީތަކުގައި އިންޖިނިއަރިން އިންސްޓިޓިއުޝަންތަކަށް ވަންނަ ނިސްބަތް ވަނީ ކުރީ އަހަރާ ބަލާއިރު 3 ޕަސެންޓަށް އިތުރުވެފައި ކަމަށް ވެސް ދައްކައެވެ. ޓައިމްސް އޮފް އިންޑިއާއިން ބުނަނީ ނާގްޕޫރު ފަދަ ސިޓީއެއްގައި އިންޖިނިއަރިންގ ކޯސްތަކުގައި 20333 ކުދިން މިއަހަރުވެސް އަލަށް ބައިވެރިވެފައިވާ ކަމަށެވެ. މީގެ ކުރީ އަހަރުތަކުގައި އިންޖިނިއަރިންގ ކޯސްތަކަށް ވަންނަ ކުދިންގެ އަދަދު އޮތީ ފާހަގަ ކުރެވޭ ވަރަށް ދަށްވެފައެވެ.
އިންޑިއާގައި ޓެކްނޮލޮޖީގެ ދާއިރާގެ ވަޒީފާތައް ހަލުއިކޮށް އިތުރު ވުމާއެކު މި ޓްރެންޑް އަދި ކުރިއަށް އޮތް އަހަރުތަކުގައި މި ގޮތަށް ދެމިގެންދާނެ ކަމަށް ބެލެވެއެވެ.
އިންޑިއާގައި، މެޝިން ލާނިން، ރޮބޮޓިކްސް، ކްލައުޑް ކޮމްޕިއުޓިން، އަދި ސައިބަރ ސެކިއުރިޓީ ފަދަ ދާއިރާތަކަކީ، މިހާރު އިސްކަންދޭ ސްޕެޝަލައިޒޭޝަންތަކެވެ.
