ފިލިޕީންސްގެ ކުރީ ސަރުކާރުން މަރާލި މީހުންގެ ގަބުރުތައް ބާއްވާފައިވާ މަހާނަތަކުގެ ކުލީގެ މުއްދަތު ހަމަވުމުން އެމީހުންގެ މިނިކަށިތައް ނަގަން ފަށައިފިއެވެ. ފިލިޕީންސްގައި ކުލީ މަހާނަތައް ހަދާފައި ހުންނަނީ މަތިމައްޗަށް ބުރި ބުރިއަށެވެ. މި މަހާނަ އެޕާޓްމަންޓްތައް 5 އަހަރަށް ކުއްޔަށް ދެނީ 5 ހާސް ޕޭސޯ ނޫނީ 100 ޑޮލަރަށެވެ.
ކުރީ ސަރުކާރުން މަސްތުވާ ތަކެއްޗާ ދެކޮޅަށް ކުރިއަށް ގެންދިޔަ ހަނގުރާމައިގައި ޝަރީއަތަކާ ނުލައި މަރާލި ގިނަ ބަޔެއްގެ ގަބުރުތައް ވަނީ މި މަހާނަ އެޕާޓްމަންޓުތަކުގައި ބާއްވާފައެވެ.
މިހާރު އެތަންތަން ކުއްޔަށް ދީފައިވާ މުއްދަތު ހަމަވުމުން ގަބުރުތައް ނެގުމުގެ މަސައްކަތް ވަނީ ފަށާފައެވެ.
ނަސޯރާ ފާދިރީއަކު ދަނީ އެތަންތަނުން ނަގާ މިނިކަށިތައް އެއްލާލުމުގެ ބަދަލުގައި އަންދާލުމަށް ދާ ޚަރަދުދީ "މައްޔިތާއަށް އަބުރުވެރި ކައްވަޅެއް ދިނުމަށް އަޅިތައް ގުޅިއެއްގައި ބަންދުކުރުމަށް" ފުރުސަތު ހޯދައި ދެމުންނެވެ.
