ޒާކިރް ނާއިކް ޕާކިސްތާނަށް ކުރެއްވި ދަތުރަށްފަހު މީހުންގެ މެދުގައި ޚިޔާލު ތަފާތުވުން އުފެދި، ބައިނަލްއަގްވާމީ ފަރާތްތަކުން ވަނީ އެ ދަތުރާ ގުޅިގެން ކަންބޮޑުވުންތައް ފާޅުކޮށްފަ އެވެ.
ލޮލުގެ ޑޮކްޓަރު ޒާކިރް ނާއިކް އަކީ، މަނީ ލޯންޑަރިން އާއި ހަރުކަށި ފިކުރު އުފެއްދުމުގެ ތުހުމަތުގައި 2016 ވަނަ އަހަރު އިންޑިއާ އިން ހޯދަން ބޭނުންވެގެން އިއުލާން ކޮށްފައިވާ ފަރާތެކެވެ. އަދި މެލޭޝިއާގެ ރައްޔިތުންގެ އެއްބައިވަންތަ ކަމާ ދެކޮޅަށް ވާހަކަ ދެއްކެވުމުން ނަސީހަތް ދެވިފައިވާ ފަރާތެކެވެ.
ނާއިކް ވަނީ ޕާކިސްތާނުގެ އެކި ހިސާބުތަކުގައި މަހެއްހާ ދުވަސް ވަންދެން ދަރުސްތައް ބާއްވަމުން ދަތުރުތައް ކުރައްވާފައެވެ. އަދި ޕާކިސްތާންގެ މަސްއޫލުވެރިންނާއެކު ބައްދަލުވުންތައްވެސް ބާއްވަވާފައެވެ.
އޭނާގެ ދަތުރަށް ބައެއް މީހުން ތައުރީފު ކުރި ނަމަވެސް، ޕާކިސްތާންގެ ދީނީ ޖަމާއަތްތަކުގެ މެދުގައި އޭނާގެ ފިކުރަށާއި ވާހަކަތަކަށް ފާޑުކިޔުންތައް އަމާޒުވެފައި ވެއެވެ.
ކްރިސްޓިއަނުން ބުނެފައި ވަނީ ގައުމީ ގޮތުން ބައިބައި އުފައްދަނިވި ވާހަކަތަކުން ނަސޯރާއިންނަށް ނުރައްކާވެފައިވާ ކަމަށެވެ. ޗާޗް އޮފް ޕާކިސްތާނުގެ މަންދޫބު އަޒާދު މާޝަލް ވަނީ އޭނާގެ ވާހަކަތަކަކީ، ޕާކިސްތާން ނަސޯރާއިންނަށް ބަލައިގަންނަން އުނދަގޫ ވާހަކަތަކެއް ކަމަށް ސިފަކޮށްފައެވެ.
ޕާކިސްތާނުގެ މީޑިއާއާއި ފާޑުކިޔާ ފަރާތްތަކުން ވަނީ ހަރުކަށި ފިކުރަށް ތުހުމަތު ކުރެވޭ އަދި މާޒީގައި ޚިޔާލު ތަފާތު މައްސަލަތަކެއް ފާހަގަވެފައިވާ ފަރާތަކަށް ސަރުކާރުން އިއްޒަތް ދިނުމުން، ސުވާލު އުފައްދާފަ އެވެ.
ބައެއް މީހުން ދެކެނީ މި ފިޔަވަޅަކީ ޕާކިސްތާނުގެ ކޮންޒަވޭޓިވް ދީނީ ފަރާތްތަކާ ސަރުކާރުގެ ގުޅުން ބޮޑުވުމުގެ އިޝާރާތެއް ކަމަށާއި، ޕާކިސްތާނުގެ ތަސައްވުރާއި ބައިނަލްއަގްވާމީ ގުޅުންތަކަށް މިކަމުން އަސަރު ކުރާ ކަމަށް ބުނެ ކަންބޮޑުވުން ފާޅުކޮށްފައެވެ.
